بطاقة
شعر - عبدالله اللويحان
الشور ما ينفع قلوب المهابيل
كالزند وان حرك تطاير شراره
لو تأمره بالعدل يعرض على الميل
يبتل على رايه بربح وخساره
والطبع ما ينزال غيره بتبديل
مثل الجدي مرساه ليله نهاره
والحنظله لوهي على شاطي النيل
زادت مرارتها القديمه مراره
شعر مثل يافاهمين التماثيل
كل يجى شعره بحسب اقتاره
من عاش ينظر بالسنين المقابيل
بذوق من عقب البروده حراره
الطيب يخلق مع قلوب الرجاجيل
ماهوب فى بنك التجاره تجاره
والرزق من عند الولى بالتساهيل
ماهوب بالقوه ولا بالشطاره
من عاش فى حيله وكذب وتهاويل
ياسرع من عقب الطلوع إنحداره
|