أبيات تحكي الواقع المر الي يعيشه أخي ( عبدالله الراوي ) خلف قضبان السجن مظلوماً :
يالله ياالي فوق عرشك ودايم=يالواحد الي كل فضلك تديمه
انك تعين الي من الوقت ضايم=جور الزمن والهم الأقشر يضيمه
لابارك الله بالردي والخمايم=الي عواقبهم علينا وخيمه
سجني ثلاث سنين غبن وظلايم=مسجون بالحاير وسجني ظليمه
لانيب لاصاحي ولانيب نايم=والنفس تشكي علة مستديمه
مكتوم في غرفة لو الجو غايم=لا أشوف لاشمس ولا أشوف غيمه
كل السبب ياناس ظلم الحكايم=شبهه وظلم وقرد حظ وشتيمه
المطرفي ماأظن حظه بقايم=من عقب ماذاق الجروح الأليمه
مضى عليه الوقت والفكر هايم=وابطى من اخوانه وشوفة حريمه
أبوي ماقصر قوي العزايم=وسيع صدر وفيه صبر وعزيمه
خلص لي الموضوع عوق الخصايم=رغم المصاعب والتعب والخصيمه
شيخ فعوله كل أبوها غنايم=الراوي الي يستحق الغنيمه
ياجعلها تفداه كل العمايم=وياجعل ربي يسكنه في نعيمه
يقولها الي ماضرى بالهزايم=رسالة لأهل العقول السليمه
صلوا على المختار راعي الغنايم=أعداد ماتمطر سحابه وغيمه
كلمات / سعود المطرفي
( أبو يزيد )