يايمه منتهي جيتك وطالب منك الغفران
أقبل قاعة أقدامك وأغسلها.. بدمعاتي
يايمه كل مافيني ينادي لك أنا ندمان
طلبتك قولي سامحتك وردي لوجهي بسماتي
أنا أدري قلبك الطيب كسرته بصدمت النكران
غلطت وغلطتي هذي تعير كل غلطاتي
تشوفي الشيب يايمه ترى ماجا وأنا فرحان
وربي اللي رفع ذاتك ونزل للردى ذاتي
فقدت الراحه من بعدك فقدت الطيبه والتحنان
بدونك راحتي غايه بدينك هذي راحاتي
أنا بعدك ولاحاجه أنا بعدك ترى عميان
أشوف..ولاأشوف اللي يوريني مساواتي
أنا وسيد الشقى والهم من بعدك غدينا أخوان
يجيب هموم هالعالم ويرميها بمتاهاتي
صدقتي يوم قلتي لي تدين اليوم بس تندان
رميتك في بداياتي ورموني في نهاياتي
أنا من شالك بيده ورماك بأسفل البركان
نخيتيني وطلبتيني ولاحصلتي نخواتي
مثل ماهنتي بعيوني عليهم يمه قلبي هان
رموني وضعاهم فزعه وأنا الدمعات فزعاتي
يايمه لاتظنيني أنا من فعلهم زعلان
سواتٍ فيك سويته سووّ فيني سُواتي
يايمه يالله ظميني ودفيني بها الأحضان
أنا أدري فيك مشتاقه وهمك بس ملاقاتي
يايمه (حيل) ظميني أبي أرتاح أنا تعبان
تعبت أهرب من ذنوبي أبيك آخر مسافاتي
أبسمع منك أي كلمه لصوتك مسمعي ولهان
أبسمع (يمهّ) بصوتك أبذكر فيها نشواتي
أشوفك ساكته يمه غفيتي ولا أنا غلطان
غفيتي يابعد عمري تعبتي من مواساتي
يايمه طالبك قومي أذا لي في عيونك شان
أشوف الموت بعيونك عساها تخيب هقواتي
تعالوا يابشر شوفوا أنا محتار أنا تلفان
أنا أمي مدري وش فيها أنا مدري أنا أحاتي
شنو؟ أمي أنا ماتت لالا.لاترى غلطان
أنا أمي ماتخليني على حزني ووناتي
أنا أمي قلبها طيب ولايمكن تُبكي أنسان
أنا أمي ماتبكيني .. ولاتتمنى آهاتي
يايمه صح مامتي؟ وصح الموت تو ماحان؟
إذا متي أنا بعدك أبقضي وين ساعاتي
يايمه قومي يايمه وقولي الموت لاماكان
أنا جيتك وأنا ناوي أببدى فيك جناتي
تركتيني يايمه وليه؟ تركتيني وأنا غرقان
ولامسموح ياوليدي!! ولاتلعنك لعناتي
أنا الجاني ونا المجني وأناالمخطي وأنا الندمان
وأنا بيدي رميتك. أيه. وبعثرت أهم ملفاتي
وجيت من الهنا مفلس.وقلبي من الضنا خسران
تركتيني على ناري... أعدد فيك زلاتي
ولاني مرضيُ ربي ولاني تابع الشيطان
أنا بعدك ترى مابين نهاياتي وبداياتي
يايمه منتهي جيتك وكلي مرتجي غفران
وشفت الناس تلعني وتحذرني!! من الآتي