من قصائد الشاعر / فهد بن عواد المطرفي ( رحمه الله )
عقب كلام البارحة صرت مرتاب=وشين يحفزه القلم للكتابه
أحس كل الناس من حولي أغراب=أظاهر إني من زمان الصحابه
ولا بعد من جيل أبو زيد وذياب=يطري إبالي شيء ماينحكابه
ودي أهاجر بس يبغالي إركاب=مثل البراق ومثل متن السحابه
من شان أجي من فوقهم كني شهاب=وأعبر بقو الباس حد الرقابه
ما جيت أنا للشعر لأجل أكسب إعجاب=جيته لأجل أكسر جمود الرتابه
ما نيب لا أخطل ولا نيب سياب=ولا نيب شاعر ذابحته الصبابه
ولا ني ملمع اسمي بكبر الألقاب=قله فهد عواد ونهى الإجابه
من لابت يوم الوغى عندها حراب=تطعنبها نحر العدو ماتهابه
اسم علم ممنوع من صرف الإعراب=أكبر مننه يعربه من شقابه
خمسة حروف وعن ثلاثمية كتاب=ويلان وفعول العرب ماتشابه
طرق الهجيني غير يطرق عن الراب=وعزف البيانو غير عزف الربابه
ماقول حنا رووس والعالم أذناب=كلٍ على ماقيل حقه غدابه
لكن لنا في قمة المجد مرقاب=وليا حضرنا كلٍ أعلن غيابه
من عمرو بن كلثوم لعقاب وحجاب=لليوم وأدني وايلي ينغزابه
وإن كانها لحقت تواريخ وأنساب=حنا الفخر من يوم عصر الحرابه
رمح الخويلد من يده للعدو صاب=يوم السحالي بالملاقى هقابه
وأنا من البارح وفي بالي أعتاب=هات الشعر ياالجن هاته هلابه
أتعوذ الشيطان وآخذ بالأسباب=وجرها موال ولا عتابه
وحدها لين أحني أرقاب وأرقاب=وأنفخ على جمري وزيد إلتهابه
وصمد بوجه العاصفة كني عقاب=عقاب ذيب الخيل كلٍ درابه
من قبل طق الباب فتحت أنا الباب=ولا عاد هاك العلم ولّي لفابه
كانت سوالف ما يحسبلها حساب=طالت وعرضت لين صارت طلابه
للحرب مشعلها وللنار شباب=ولايغلي المرقاب من لا رقابه
وللمجد تاريخه وللحق طلاّب=صوت الفشق ينطح نبيح الكلابه
وايل أصل وايل فصل وايل حجاب=وايل لنا في ساعة الضيق لابه
وايل فخر وايل ذخر وايل أسراب=وايل لعميان البصيرة طبابه
وايل ماهي دويلة عصابات وأحزاب=وايل إمارة عرق دم وقرابه
وايل تذل ولا تهقواها الأشناب=بالسف الأملح مانعين إقترابه
ياهيه يالعميان فك قيد الألباب=طويق ماتشكل عليه الذبابه
مانيب ملحقها مشاريه وسهاب=لا شك أبعطي للسؤال الإجابه
إن طاب سلطان البلد حاجبه طاب=وإن خاب تلحق كل شعبه خيابه
[/poem]