أكتب بدَمّ القلب.. والناس يَقرون
اليوم انا بالهَمّ والحزن مسكون
والاِبتسامه عَن محيّاي زاحَت
أكتب بدَمّ القلب.. والناس يَقرون
كلمَة وفا مِن كَفّ راسِم, و ناحِت
يَ العدل: سيف العَدل داخِلْك مدفون
وحمامة الكعبه على القبر ناحَت
حَمَام مكّه ناح, والناس يَبكون
ونجمة سواد الحزن! بانَت, ولاحَت
العَود يَجهَش, والولَد بات مغبون
واِرتاعَت العَذرا, و طاحَت, وصاحَت
ضاقت صدور وْساع, واِنحَرْقَت اِعيون
آلاَم, ودموعٍ على الخَدّ ساحَت
انتابني تفكير, واِحساس مجنون
واَستَغفِر اللْه.. قِلتها و اِستباحَت:
مع موت نايف!.. كَنّ الامّه يموتون
في يوم واحد.. والمخاليق راحَت!!
ما مات نايف! مات عشرين مليون
قوافل الشَعْب السعودي تناحَت
يَمّ المنايا, والحزن, و اَسوَد اللون
وعنهم دروب الزين! بالوَجه شاحَت
مع موت نايف ياعرب: وش تقولون؟
يامن مشاعركم بالاسرار باحَت!!
قولو معي تكفون ياللي تصَلّوُن
يامن حزنتو, و افئدتكم تلاحَت
أرجي من المعبود, والناس يَدعون
دعْواتنا من داخل الصدر فاحَت
إنك بداخِل جَنّةٍ عرضها الكَون
وروحك لِقَت مطلوبها, واِستراحَت
واحبابك اِنجرحْوا بفقدِك, ويَبكون
واِقلوبهم في داخل القبر طاحَت
عبدالرزاق بن مخلد الذيابي