الأمير عبدالله الفيصل
«وراك تزعلني وانا فيك مفتون
ما خفت يا فتان رب البريه
مظنون ما غيرك من الناس مظنون
الا.. ولا للقلب غيرك تحيه
ابتبعك لو قالوا الناس مجنون
لو زرت باسبابك حياض المنيه
الحب ذا شي على الناس مفنون
اللي وطا الاول طريقه عليه
اللي يعرفون الهوى لي يعذرون
يدرون ما بالحب ذنب وخطيه
لا واهني اللي للاحباب يرجون
وانا انقطع حبل الرجا من يديه»
(عبدالله الفيصل)
❊❊❊
«يا صبر قلبي عقب فرقاه.. صبراه
يا جابر تجبر عزاي بوليفي
يا كثر حبه في الحشا اعوذ بالله
ما صار حبه نار، صار تحريفي
حب ورحمه مع موده وما واه
منه انطوت حالي وقلبي ضعيفي
احب انا حكيه وذكره وممشاه
كنه يغرف من حشاي تغريفي
يا لايمي في الحب ويلك من الله
لا صار قلبك مبغضٍ لا تحيفي
(فهد بن أحمد)
❊❊❊
محمد بن ناصرالسويلم
«ليت التليفون من يمّك
ما ينقطع يا بعد روحي
فالهرج لا صار من يمك
يصير بالحيل مملوح
يا خفَّ روحك على دمك
عندك سواليف ومزوح»
(محمد بن ناصر السويلم)
❊❊❊
«بدر حسن شعّ لي نوره
ابتهرت حرت من نوره
كنّ في خده ترى وتشوف
شمعةٍ في جوف بلّوره»
❊❊❊
قضيت بين النقا والبوق
شهري ودهري وساعاتي
مع جادل لامها معشوق
ما طعت فيها ملاماتي
سحّارة العين والمنطوق
والخد ميّا أو ماياتي
ومجدّلات الغضى من فوق
ردفه عرابيد حيات
من شفت مطرودها ملحوق
واليوم راحت براحاتي
والقلب فيها يخفق خفوق
وانحل بالغي حالاتي
بالبال لك خادمٍ ما سوق
ناديت يا زاكي الذاتِ»
(محمد بن لعبون)