هي غايتي والغير نجزاه تطنيش

مجاراة لقصيدة الجريش

هي غايتي والغير نجزاه تطنيش




الشاعر والصقار خالد بن سليمان الجريش من اشد المولعين بالطير وله الكثير من القصائد في القنص ووصف الطير نشرت له صفحة خزامى الصحارى قصيدة يوم الجمعة 15 / 9 / 1433ه بعنوان (ثلاث) وجاريتها بهذه الابيات المتواضعة:
قاف(ن) جديد(ن) ما لفاني روايه
على الخزامى من بعيد المداغيش
خالد ابو سليمان وانا لجايه
يبين مع شوفة اصعاب المناويش
معاني(ن) بالطير ماهي دعايه
حب وولع والنفوس فيها مباهيش
وكل(ن) على شفه يجي له رمايه
وبالطير ما الومه وغيره مباليش
ناس(ن) لها بالطير حب وولايه
للوسم حسبتها ولا همها العيش
وانا هواي وغايتي من صبايه
شوفة فياض(ن) ما وطاها حشاحيش
ما غير فيها الطير زج الغنايه
من دون صوت الطير ما فيه تشويش
اسج عن شي(ن) يعكر صفايه
في خاطري ما ثمنوه المرابيش
حب الحبيب اللي تمكن غلايه
هي منوتي من ناقضات العكاريش
يا ابن اجريش والله ما يروي ظمايه
يا كود شوف الناعسات المراميش
اللي لها بالقلب مثل البنايه
هي غايتي والغير نجزاه تطنيش
واعداد ما نجم (ن) يبين بسمايه
ازكى صلاة الله على صفوة قريش
سليمان المطرودي