فـــريح مــشهدالــمطرفي ( كـنك لـنا عبدالــعزيز الـجزيره)

السلام عليكم انقلها لكم كما كتبها شاعرها في أحد المنتديات


قيل لابي تمام أن لك قصائد قوية يكون فيها بعض الابيات الرديئة فلم لا تحذفها فأجاب بأن ابيات الشاعر كأولاده مهما كان ولده قبيحا لا تجود نفسه بالتخلي عنه ، وهذه الابيات وليدة لحظتها من دون تنقيح وتعديل ، والمعذرة على ما فيها من ارتجالية واضحة ..
وهي بعمي الغالي : فريح بن مشهد المطرفي الذي شهد له البعيد قبل القريب .. ولا عليكم زود ..

الله يـا عمـي يمسيـك بالخـيـر

ليـلٍ وشفتـك فيـه والله خـيـره

وشلون اعبر عن غلاتـك بتعبيـر

انا اشهد انـك يالسنافـي ذخيـره

طير الهدد ، والصيد لا جيته مغير

عز الله ان الطير ما طـار طيـره

انت السند وقت الـوزا والمعاسيـر

لا صرت جنبي والعسيره يسيـره

وانت الذي لا جيت تقطن على البير

وانت الذي مـدك عطايـا كثيـره

وانت الذي لكليب يا سالـم الزيـر

يومٍ تملـك صـار لجلـه وزيـره

بشسع نعل كليب خلّص على جبير

خلاه لجل كليـب يلقـى مصيـره

انت الذي بالباس شيخ المساطيـر

وانت الذي بالحلم قصـه وسيـره

وانت الذي بالحرب نفـاخ للكيـر

شباب نار الحرب نـار السعيـره

تنطح نهار الكون منهـم طوابيـر

يطول ليـل اللـي يدينـه قصيـره

اليـن يقفـي بالعنـا والمخاسيـر

من عقب زومه جاه مـر الكسيـره

يقفـون بالخيبـات ولـوا مدابيـر

ولت به النكبـات حايـس مريـره

بارض الهدد يمناك يشبع بها الطير

عشيتهن من بعـد هلـك الظهيـره

وانت الذي قدرك علا كـل تقديـر

بعـدك فـلا والله لحيـه قـديـره

فتاح بابـك للضيـوف المساييـر

كيف النشامـا دوم واقـف تديـره

يلقون بالرسـلان كيـف المباهيـر

لا صار ريح العود شمـوا عبيـره

يا جابرٍ بالعطف كسـر المكاسيـر

عطفك عليهـم يالسنافـي جبيـره

ياكاسـرٍ بيديـك عظـم الجبابيـر

تكسر عظام اللـي نفيسـه كبيـره

يا مخاشرٍ بالزاد سبـع المساعيـر

خشيرك السرحان وانتـه خشيـره

علمك وصل حد اليمن واصل الدير

طير السعد يا عز وجـه العشيـره

سلام يا شيخ السلـف والمظاهيـر

يامالـكٍ راس الكـرم يـا اميـره

اشهر على راس العلم بالمشاهيـر

انت الذي وقفات جـودك شهيـره

ما همك بدنيـاك جمـع الدنانيـر

ولا غرتـك دنيـا دنيـه حقيـره

يا بو اليتامى والضعوف المحاسيـر

اللي قضى بدنيـاه نفـسٍ حسيـره

وانت الذي بالعقل حكمـه وتدبيـر

عمي لنا عين البصـر والبصيـره

لامن تزهل بالخطـر والمحاذيـر

لا حلت اللزمات مـا فيـه غيـره

ضوه غطا ضو النجـوم المسافيـر

والطيب منـه مستفيـضٍ غديـره

يا مصخرٍ ماله من الجود تصخيـر

يا حامـيٍ منهـو لجـا يستجيـره

الطيب عبدٍ لك مهو بقـول تزويـر

اكبر كبيره فـي عيونـك صغيـره

ما عمرك بطيبك حسبت المخاسير

الطيب طبعـك بالعلـن والسريـره

اسمك تعلا فـوق كـل المشاهيـر

حتى القمر يغبطك حسـدٍ وغِيـره

والشمس مكسوفه على حزة عصير

نورك غطا بالنور شمـسٍ منيـره

بالخلق كنـك للصـلاوات تكبيـر

وانـت الـذي للخلـق دارٍ وديـره

يا جاير الجاير اذا جـاك بتجيـر

من حط برقبتـه عظيـم الجريـره

يا مزبن الجاني بوقـت المخاطيـر

اللي على نفسـه جرايـم خطيـره

احلى وصوفك من درير المباكيـر

وباسك على العايل سيوفٍ شطيـره

يا مدله المحتـار صبـرٍ وتبشيـر

يستانس المحتار مـن بعـد حيـره

يا ستر بالشدات ضعـف الغناديـر

لا طشت الغشـوه بهـا تستجيـره

سيلك هما نـو السمـا والمحاديـر

يبرق خيالك بالسمـا مـن هديـره

انت الذي للنـاس عيـن المقاديـر

كنـك لنـا عبدالعزيـز الجزيـره

وختامها لعمـي اسـوق المعاذيـر

لو اني اكتـب بالقصايـد جديـره

سطرتها بالقـاف للمجـد تسطيـر

كنه حريرٍ ناسجـه مـن حريـره

اقول في عمي ومـن دون تاخيـر

يا عزنا اللـي مالنـا عـز غيـره

اعذر قصوري كان بالقاف تقصير

والسيف ما ينفـع بلمعـة جفيـره

عجزت بالكلمه اصـورك تصويـر

كل القوافي منـك تبغـى الستيـره

ازكى صلاتي مع سلامي وتكبيـر

للهادي لربـه جــوارٍ وجـيـره

منقوله للشاعر /عيد فرحان المطرفي والذي نتمنى انضمامه قريباُ كما وعدنا بذلك

ونعم والله ابو عبدالله يستأهل معروف بطيبه عند الصغر قبل الكبير
وصح الاسانك يبو طارق
مشكور على النقل ابو فرحان

يستاهل شيخ الكرم ورمز الشهامة ( جدي فريح بن مشهد أبوإيديه المطرفي ) الذي تشهد بكرمه قبيلة عنزة وشمرسواءا في مدينة رفحاء أوعلى مستوى الشمال

والله ونعم بابو عبدالله

وصح لسان الشاعر

ويستاهل ابو عبدالله

فريح بن مشهد ابو عبدالله
اسم غني عن التعريف
تميز بالطيب والكرم
وهي صفه يعرفها الجميع عنه
ويستاهل معلقات من الثناء والشكر لجنابه
من الصفات الاخرى التي تميز بها صلة
الرحم وتواصله لاقاربه
اضف الى ذلك خاطره البهيج الذي يأنس به
من يجلس معه
محبوب من القريب والبعيد
مواقفه كثيره لاتعد ولاتحصى ... مع الجماعه
وغير الجماعه
اسأل الله ان يمده بالصحه والعافيه وطولة العمر

الف شكر لك شاعرنا على هذه الابيات

فتاح بابـك للضيـوف المساييـر

كيف النشامـا دوم واقـف تديـره

يلقون بالرسـلان كيـف المباهيـر

لا صار ريح العود شمـوا عبيـره

ابو عبدالله
اخو وعزيز وغالي علينــا ، وعلمه طيب عند القريب والبعيد

اسأل الله ان يمده بالصحه والعافيه وطولة العمر

يعطيك العافيه يا ابو فرحان على النقل

وصح الله لسان ابو طارق على هذه الرائعه الله يرده لنا با لسلامه

ويوفقه بدراسته اللهم امين

اخي سالم ابو عبد الله يستاهل اكثر من ذالك فمهما قلنا من المدح فيه لن نوفيه حقه

يعلم الله اننا نفاخر فيه وهو اهل لذالك ولا هو قصور في باقي ربعنا



تقبل مروري

أخوي / فيصل الــوطيف

نورت المتصفح بمرورك والله يعطيك العافيه الله لايهينك...
القصيده أكثر من رأئعه ومازاد من روعتها وجمالها أنـهـا في الهرم الشامخ وسـيـد الــكرم الذي لم يتصنعه وإنما هو بالفطره ...
يعمل الخير للناس لوجه الله عزوجل وليس ليقال عنه يعمل كذا أمام الناس للمفخره
والعم ابو عبدالله أطال الله في عمره وأمده بالصحه والعافيه وأكثر الله من أمثاله بيننا ...
كلماتي هذه لم أودأضافتها مع نقلي للقصيده وإنما نقلتها كما هي في أحد المنتديات التي كان ابو طارق عضواً فيها والقصيده لها أكثر من ثلاث سنوات في ذلك المنتدى ورأيت انه من الاولى نقلها لمنتدى القبيله

دمتم بوووود

الأخ /عمر
نورت المتصفح والله يعطيك العافيه على المرور
واقول هنيئاً لك أنك حفيده وأفتخارك به يزيدك فخراً

دمت بوووود

الأخ / المنادي

الله يعطيك العافيه على المرور ونورتو المتصفح

تقبل تحياتي

دمت بووود