ديوان جوهر البيان في مدح بن فهران

الشاعر: محمد حسن صيفان القيسي

البـارحـة جـرح بـقلبـي كـواني = وجريت من بين المعـاليق و نـات
وكـتبت من فـكري بيوت ومعاني = للعارفين أهـل القـلوب الفـطينات
مـنهم أبـوسلـطان جـزل الحساني = حلحيل شيال الحـمول الثقـيلات
ساخي اليمين ومن حر ماله عطاني = وما يلحق العطوه حسايف ومنات
صـقر ترعـرع مـن جـذور متـاني = صيده سمين ولايصيد الهزيـلات
بسمـر الـقنا ومـرهفـات السنـاني = نلتوا المعالي من عصورٍ قديمـات
لـك منـزلٍ في عـالـيات المبـاني = ولك بالثريا فوق سمره وقيلات
وأنـا عـن التعبيـر يعجـز لسـاني = إلكم على هام السحب فوق دورات
أولاد وايـل مـن قـديـم الزمـاني = والكم على العدوان يالشيخ صولات
فـرحان ياللي ضد كـايد وشـاني = من عـاندك يلقى مع الويل ويلات
وربعك هل الطـولات سر وعلاني = مـطارفة يـوم انتخـوا بالشويهات
وأنا ليـا جـار الزمـان وجفـاني = وكثرت همومي والسنين المخيفات
ذكـرت ربـعٍ يفهمـون المعـاني = ونصيتهم لا صـار بالـدهر ميـلات
منهم أبو سلـطان رفيع المـكاني = راعـي العلـوم الطيبـات الجميـلات
ما قـال ذا سعـودي وهذا يمـاني = له بالرجـال اللي عـزيزين نظـرات
يشهد لكم بالجـود قـاصي وداني = عسـى حياتـك يالسنـافي مسـرات
في مجلسه تلقى صحون وصياني = يذبح سمين الضان يـوم المجاعـات
سـيله ليـا حــدر يعـم المـواني = له همةٍ عـدى البحـور المحيطـات
ليثٍ على العدوان و للمجد بـاني = خلى سباع البر يمش(ن) مطيعـات
وهذي تحيات ابن قيس اليمـاني = تهدى لمن شـال الحمول الثقيـلات

الشاعر: محمد حسن صيفان القيسي

يا لله يا رحـمان يا عـالـم الشـان = رب(ن) كـريم وسائلـه ما يخيبي
تفـرج لمن قـلًبه معـذب وحيران = ويشكو علـى رب الخـلائـق يجيبي
خالق جميع الكون والإنس والجان = ويجير عزا من كان جرحه عطيبي
أحس في قـلبي حـرائق وبركان = وجـار الزمـان وقـلت هـذا نصيبي
وشيل في جوفي وساوس وكتمان = مـن الصبـاح ليـن شمسـه تـغيبي
ومـن ذا نـاديت للـشيـخ فـرحـان = ابن الكـرام ويكـرمـون الغـريبي
أفعالهم تذكر على طول الأزمـان = وزود(ن) على هذا شجاعة وطيبي
وهذه قصيدة تاصل الشيخ فرحـان = شهـم(ن) لفكـاك النشب مـايغيبي
يشبـه بهدًاتـه كـما ذيب سرحـان = ليا جاع تالـي اللـيل يقنب قنيبي
يا شيخ أنا جيتك مسيّر وعجـلان = يلـي بعـادات الكـرم لـك نصيبي
عادتـكم عمّت صديق(ن) وعـدوان = ويحكـى بـها عند البعيـد وقريبي
يا المطرفي جدك سلايل كحيلان = وبوك يبـرز في الزمـان الصعيبي
متوارثينـه بين حضـرن وبـدوان = قول الصمـايل عند شب(ن) وشيبي
تشهد لكم حرب وجهينه ومطران = و الدوسـري و الشمـري و العتيبي

الشاعر/محمد حسن صيفان اليماني

يا الشيخ جفيت الدار ولا الدار جافيك = يومين عنـا غـايبٍ مـا تـجينا
لـولا غـلاك يا الشيـخ ومعـزةٍ فـيك = منشت عـنك يا سخي الـيمينا
أنت الــذي دايــم بعيـده مـرامـيك = وأنت الذي صيتك مع الغانمينا
لا عـاش من هو يالسحـالي يعـاديك = يا مروي العطشان بجرد السنينا
ليا جـاك مضهودٍ من الضيم ناصيك = تعطيه من غـالي الحلال الثمينا
أنت الـذي تسهـر عـدوك مغـازيك = ضد المعـادي وتنطـح الطامعينا
ما فيك عذروبٍ ولا فيك تشكـيك = عذروبك أنك مروي العاطشينا
عـز الله أنـا يا بن الأجـواد نغلـيك = والا الـردي من شـوفته ما علينا
الكـل منـا يابـن فهـران يـرجـيك = أنت الأمـل يـا تـرفـة الغـانمينا
بروحنـا يـامعـرب الجـد نفـديك = وحـنا على درب المـراجل نـشينا
الطـيب لـك عـادة وورثٍ وتمليك = تعـاقبـوه أجــدادك الأقــدمـينا
و ربعك بأيام المعـاسير تحمـيك = بمعسكرات الخيل جـوا مسـرعينا
فعلـك وشيخان القبايل تزكـيك = ما يجحدك كـود البخيل اللـعينا
الله على حـب الجمـالات معطـيك = يا اللي على الشـدات حبلـك متينا
من فوق هام السحب شيد مبانـيك = أتنــه ونجــم سهيـل متقـارنـينا
كل العلـوم الطيبـة تنطبق فـيك = يا شوق حور العين صـافي الجبينا
أبو شعورٍ اليـا أنثرهـن تـدفـيك = وحمر الخـدود ونـاقشات اليـدينا
قَدًّمت معروفك فـلاني بناسـيك = دايــم علـومـك تسبـق الأولــينا
أهلا هلابك أنت واللـي موالـيك = يااللـي ليا جـيت المجـالس تـزينا
بالمسك والريحان والورد نهديك = وفل اليمن من قلب صنعا شـرينا

هذه القصيدة قالها عساج مهيدي العنزي

ياحسين لا تبكـي تـرا القلـب مـرهاش = وأن ضاق خلقي بالكم تسألوني
وجدي على اللي نزلهم من وراء الطاش = وشيب عيني كأنهم يذكروني
صبـري مع الأجنـاب كني على نـعاش = وياليـت حبلـى ينقلنه قـروني
ويـاليتني عـن ديـرة الـزور منـحاش = والبـق عسـى ما شـافنه عيوني
يـا أبـو سـناء يـا بعـد كـل هــلاش = ودي أشوفك والعـيال أذهبوني

ولقد جاء الرد على قصيدة فهران جدوع العنزي وقد قالها دهيم محمد العنزي نيابة من أبنه"فرحان فهران العنزي"

خطـاً لفـانـي زاد قلبـي بتشـويق = من والــد يعطف عليـه بوده
ورحبت به ترحيب قلوب المشافيق = اللي تلاقوا بالوعـد عقب مده
وقـريت عباراتـه بنظـرة وتطبيق = وأنا لكم مرهون في كل شده
والطيـب نعمل به تجارة وتسويق = وكم قاصـر حبلـه علينا نمده
نشـوم للعليـا بـروس الشـواهيق = يـوم خطـوا اللاش نفسـه ترده
نعمل بالحسنى ولا نـريد تصفيق = واللى تمـد ايمـاننـا مـا نعـده
يا والدي لا تطيع هرج المطافيق = اللي لهم في عرض الأجواد هده
أهـل النميمة والعلـوم اللصاميق = هـراجـة المجلـس بليـا مسـده
أبــوابهـم عن النشـامـا مغـاليق = وطيبـهم عنـد مزينـات المخده

.

قصيدة سليمان الجفري العنزي في مدح أبي سلطان :

فرحان بن فهران فكاك الأنشاب = فعولك يا أبو سلطان ما هي خفيه
يالمطرفي رفعتنا فوق السحاب = والله ما أجامل ولا أنطر عطيه
إن شفت في جده ديوان له باب = مفتوح دايم ولا يسكر مسيه
اعرف ترا فرحان موجود ما غاب = يهلي بضيفه ويحتمي للسميه
هذا الصحيح وإنت طيبك فلا غاب = عن القبيلة كلها بالسويه
ما عندك التفريق ولا عندك أحزاب = تفزع وتعطي ولا تدور هديه
والله لو أعرف لألف لك كتاب = إسمه أمير العزوة الوائليه
وأحط إسمك فوق مع صورة عقاب = وأكتب أبو سلطان راع الحميه

الأبيات كما وردتني .

.











أبيات مغيضه جدوع الحسناء بأبو سلطان :

مشيت من عندنا وأقفيت = نهجت والقلب ما وده
مع السلامة يا نور البيت = من الخرج لياما تجي جده
نفسك ما طابت ولامليت = اللي لك سنين ومعده

.

بشير سماح الجعفري العنزي :

الساعة اللي عرفتنا على رجال = يا علها تعود بأحلى وسيله
اللي مثل فرحان للربع مدهال = فرحان بن فهران يعجب قبيله
اللي إليا دكت همومك على البال = فرحان يبرك للحمول الثقيله
فرحان ياحدك زمانك على الجال = مثل الجمل فرحان حمله يشيله
إن جيت له تلقى تراحيب ودلال = وتلقى الرجال بمجلسه كل ليله
ومفطح ٍ يقفاه دله وفنجال = ودخون جاوي دايم ٍ له شعيله
فرحان بن فهران تفداه الأنذال = رجل مواقف والمزايا نبيله
فرحان ما قالوا شحيح ٍ على المال = تنفق يمينه والفعايل جزيله
الوايلي راع الوفا معرب الخال = وقفات أبو سلطان ما هي هزيله
فرحان يعرف من صناديد الأبطال = شوق الهنوف اللي تكد الجديله
يستاهل التمجيد مع زين الأمثال = فرحان حمله يا تبين يشيله
من راس وايل ما تهزهز ولا مال = المدح يا قلناه به يستويله
والناس مثل الناس والفرق الأفعال = وإلا إنت لك ماقف يعز القبيله

هذه الأبيات قالها الشيخ غازي عقيل الجربا في فرحان فهران المطرفي العنزي :

وأنا نيابة عن الجربان = ما في مثل طبعك ونوعك
أنا أشهد إنك من الويلان = ونعم من احماك وفروعك

	خاصة الى الأخ فرحان فهران العنزي من/محمد ابن عرنان 16ـ شوال 1420هـ 23ـ يناير 2000م ماكل شخص يقبـل الجـور والذم .. ولا كل رجل عن كلامه تراجع أقـول يـا محمد عف الهاجـس ونم .. وانا همـومي ما تريـد المضاجع فـرحان أبن فهـران يامسنـدي سم .. وارجوك لا تجيب طاري المناجع قفا السلف واقفت شهامة هك الكم .. وقمنـا نـدور فعلهـم بالمـراجع وأسأل موفق هـرجنـا كامـل وتم .. كم أجودي يشكي الليالي تفاجع وأوجــاع مـاتبـرى مواجيعـها دم .. عيــا يـروح وزاد داء المــواجع