بسم الله الرحمن الرحيم
السلام عليكم ورحمة الله وبركاته
مصافحه أولى لقلوبكم النديّة الطاهره ....
عساها تجمّل ,,,,,,
ياسلامي على أهل الطيب وأهل النعاره
من صميم الشاعر اللي يفاخر سنامه
أتنومس بربعي فوق هام الصداره
فالعلوم الغانمه والوفا والجهامه
للمواقف مواقف والمراجل جساره
معتلين المراقب عانزين الغمامه
إن لفاها فقيعي محتميها بجداره
وإن لفاها نصيري تلزمه بالشهامه
من سلايل فعايل في صريح العباره
مطرفي ساس وايل لاخلا ولاعدامه
الله اللي عطانا نعمتين وصطاره
الكرم والشجاعه زود حكم وزعامه
تحت ظل الإمام اللي بناها مناره
حامي بيوت ربه حافظن للكرامه
وإمتداد التطور في سمو الحضاره
دور صقر العروبه فخرها والزعامه
بالكرم فاق حاتم لنّ فعله شعاره
جعل عمره مديد وبالرخى والسلامه
ياجناب القصايد وإهبطي في مطاره
علها للعدامه كان مااوفت مقامه
إحتشدت الجزايل وإغتنمت المهاره
ولاتوفي بحق اللي تسمى حسامه
إنت نهرن قراحه نارده للطهاره
من نصى راحتينك فارقته الندامه
وإنت رمز المكارم يالملك وإفتخاره
وإنت حد الحقيقه فالكتاب ونظامه
وإنت شمس الكواكب والملوك بمداره
لاظهر نور شمسك كل نور بعمامه
وإنت رفعة بلادي ماحسبت الخساره
وإنت ورث البلاد اللي بناها إمامه
وإنت صدر الشمالي يوم بيّن نهاره
فالصبر والمراجل والفعل والجزامه
وإنت شعلة بلادن فالحكم والإماره
وإنت مكسب بلادن مالقيت إنقسامه
وإنت رجلن عظيمن ماتغيّر مساره
فالعدل والزكاة وليل قايم قيامه
بإختصار الجزايل إنت رمز إزدهاره
والدروب السفيره كلها بإستقامه
من سلايل لوايل لااحتمت كل غاره
كل قومن ولاقوم إعنزه فالشهامه
ماعنزنا المفاخر من هياط وتجاره
والرخوم اللي تهايط بعلم الرخامه
ماخذينا المراجل في قروشن شطاره
ولاجهلنا الملاقى يوم شد إزدحامه
مستوانا شموخن يستحال إنحداره
كل جيلن في شموخ والعلوم بضخامه
من نوى شر فينا ذاق كاس المراره
والبحر موجه شديد سطوته بإلتطامه
كل رجلن لوايل ميزته بإعتباره
يتبع لشور ربعه ويتحيزم حزامه
لإنتخى ولد عمه ماارتخى بإعتذاره
ساق عمره فدا له ماشهر بإنهزامه
ولاانتخت فينا هنوف ضايقتها الكداره
لعنبوها المنايا دامها فالكرامه
السيوف أصدق دليل من كتاب وقراره
والشرف يحني راسه للفعل وإحترامه
مامدحت إلا رجال عزهم في وقاره
ولجميع القبايل بصمتن مع علامه
وأحمد الله مدامي مطرفي بالصداره
عصبتي تاج راسي هامتن تلو هامه
أخوكم / حمدان بن ربيّع المطرفي العنزي