ألشاعر ساكر الخمشي

للشاعر ساكر الخمشي قصيده غزليه عذبه حين احب فتاة من قبيله اخرى صادفها في أحد الأعياد ,
ومنها نعرف أن جملة ( عساك من عواده ) كانت الكلمه الدارجه بين أبناء الباديه للتهنئه بالعيد كما هي لدى الحضر . .

يقول ساكر:

عساك من عواده اللي تعوده = اللي سقاني ذبله في ضحى العيد
الجادل اللي كن زمة نهــوده = نبت الزبيدي في محاجر جليــعـيـد
من خلقة الدنيا وبنيـة عموده = والبيض في كيد الهوى كيدهن كيد
نمرعلى وضحا قصيده شهوده = ومن قبلنا عينت عليا وأبا زيــــد
ولد الخفاجي راح وأمه تذوده = قلبه خذنه بالمنى والمـواعـــيد
يبي يوري مع هل الخيل جوده = ورث لنا قصر الأخيضر وعربيد



ـــــــــــــــــــــــــــــــــــــــــــ

جلس ساكر الخمشي في مجلس ابن رشيد فجاب ابن رشيد ذلول حمرا نجيبه وقال من ياصفها فهي له فوصفها ساكر وابن رخيص وفاز بها ساكر .

قصيدة ساكر :


انـا شــفـاتـي حـايـل حـيـلـوهـا = لياما تعـادل بالاباهـر شـحـمـها
مثل القموع ديودهـا مـا احلـبـوهـا = فصلت بـدن مـا بيـن فخـذه وفمهـا
وصـايـف الـريـمي إلـى وصفـوهـا = مـار أن في عينـك تكابـر اقـصمهـا
لـو أمهـا بضرابها مـا احفظـوهـا = كان أتهموا غدي الوضيحي غشمها
عـوصى نجيـبـه للسـفـر ولـمـوهـا = حايـل ولا عـمـر الحـويّـر لـغـمـهـا
ذلـول من هجـن اللحاوي شروهـا = يا كبـر حـظ الـلي قـنـاهـا وغـنمهـا
عـينـه تـشـادي جـمـرة خـلصوهـا = أركـا عـليـه السمكري مـن فحـمهـا
عين السروق وسرقـته كـد لقوهـا = نتـفـت سواعـد لحيتـه مـا حشمهـا
شيبا ضهر من كثـر مـا غربلـوهـا = ولا هـي بـرغـايـه كتــوم نـسـمهــا
زبـن الثـنيـن بسهـلـة مـا مشـوهـا = اليـا حميت الشرقة وأكلهم وحمهـا
جهـال غـادين البـخـت وأجهلـوهـا = قـامت اتـقـرط بالمـزاهـب اعممهـا
وأن مهلـولـه بالرسن وانهمـوهـا = تفصم قراريص الرسن مـن عدمها
وإلـى حـداهـم واهــج واعـتـلـوهـا = راحـت تـقـل دلـوٍ تـقـّطـع وذمـهـــا
أسـرع مـن الـلي بالـولع نفجـوهـا = تـزبـنــت قــور تـقــادح رضـمـهــا
يرجون منهـا المـاء إلـى وردوهـا = لا حـل فـي تـالي الـركايب وهـمهـا
اليـا روحـت كـل الـرفاقـة رجـوهـا = الكـل يـركض عـدهـم مـن خـدمهـا
تشـدى تجضـور خـفـرة زوجـوهـا = لخطـو الغشيم الـلي بكـفـه رشمهـا

ـــــــــــــــــــــــــــــــــــــــــــــــــ


من قصائد ساكر الخمشي هذه القصيدة :


الله يا اللي تـودع المـزن نـاشــــــي = تفـرح لحال نش مـا ضل فـيـه آش
قـلـبي كـمـا قـدر وقـوده أقـشاشي = غدن طرافه سود من كثر الوحاش
عـلى غـزال مـرنـا العـصر مـاشي = صاب الضمير وفات ما كن سواش
بـاعـن ولا بـعـتـه بـكثـر المعـاشي = باعن برخص وبيعتي بيعت ابلاش
يـا بـايـع النـفس العـزيـزة بـلاشي = كا جالب الدانـة عـلى غيـر طـواش
وأن كان ما حصلت خـلي ولا شي = دغلوب خبـرا نش مع ميها النـاش
ترى السحاب أول مطرها رشاشي = تـتـلـيـه وديـان تـرشـع بالأقشـاش
يكـفي عن اللبس الجديد العشاشي = ويقراك من لا ضيّع السمت فراش
بالك تهوش أن كان مالك مهاشي = ترى أشرد الذلان بالكون من هاش
.....................
من قصائده

يالابة ما انتم بعين العدو شين = ماهو ردى فيكم ولا هي خيانة
اصحوا تراكم للمعادى عدوين = لا تفرحون اللي بقلبه لعانة
صيروا كما الجوهر بعين البعيدين = حتى المعادي يستميت بمكانه
من خلقت الدنيا و خلقة سماعين = ما شيخ الا كود تتليه عانه
وكان الجدا هرج بوسط الدواوين = رواه تهاج من ورا الشط عانه

شدو الطواله من عند ابرق الجعله وراحوا وصاروا وراء ابا الدود .. فقال ساكر :

نـطـيـت معمرداً وقـت الادمـاس = داري بـراسـه مايـعـقـب لنـا زود
لازان شوف العين طالعت الأوناس = لازم تطالع من ورا جـرع أبا الدود
القلب مشتان يـبي نـاس مـن نـاس = لوسيروبي من مشاري على سعود
مشتـاق لـلي طبختـه ما لهـا قيـاس = لا جـاء يقلبها عـلى الغمر مرجـود
كنـه يصالي من رعايـا أبن حـواس = صكـوبـه الـرعيـان والجـو مـارود
يـا وي محـمـاس ويـا وي حـمّـاس = تجيـك صفـراء مـا بطاريفهـا سـود
لـولا سبـيـل نطعـسه يـقعـد الـراس = لا طق لامنه حضب عود من عـود

.................

وهذه القصيدة الجميلة لساكر :

يـا دار ويـن مغيـزل العـين يـا دار= أتـلا الخـبـر فـيهـا غشنـك انـزولـه
يا دار ما كنـه وقـف بـك ولا سـار= بـس المـراح وبـس درب المحولـه
يـتـلـون بـراق وقـع منـه الأمطـار= أستـبـرقـوه وعـسـوه وأرحـلـولــه
يازين حس فرنجهم وقت الأسحار= الصبـح طـرد وقـيـّلـوا بـالـدحـولـه
بـمـشـحـط نــزر نـدبـهـا إلـى ثــار= مـا قـيس بالقفلـة بالأمـيـه تـنـولـه
أقفـوا بغطروف عـلى كبـده أمـرار= قـنـوا مـن العـيـطـا لـيـالي حلـولـه
العين عين مشقلب الخرب لا طـار = حـر سـراويـلـه تـعــدا احـجـولــــه
حـر عـديـم ومخـلبـه تـقـل شنكـار = متـفهـق الجنحـان عـرضه بطـولـه

ــــــــــــــــــــــــــــــــــ

هذه القصيده قالها ساكر في مدح ابن مهيد :

يـا راكـب الـلي وسمهـا عـارفـينـه = حـدرٍ من الثفنـة على الفخـذ مندار
مـردات قـيـظ ولـلـبـراري سـفـينـه = تعـبـأ لـجـداع الـقـرانـيـس بـالغـار
وأن تـلـت الأرقـط وهـم قـاضبـينـه = عين العديم الياسمع صيحت الجار
عيـن السروق وسرقـتـه شايفـينـه = طـارت عيونـه شايف بشعـة النـار
عيـن الهنـوف الـلي تـراوز خدينـه = تـبغـي تـبيـّن لـه خفيـات الأسـرار
بـالـقــايـلــه دلا يــدادي قــريــنـــه = شـراب خـمـر وسامع دقـت الطـار
حـطـّت هـذاك ايسـار وهـذا يميـنـه = وتـنحـرت شبل الضواري إلى ثـار
تـلــفـي لبـيـت كـلـكـم خـابـريـنــــه = يشبع بــه الجيعان بالموسم الحـار
بـيت لأ بـو النوري منجـي خـدينـه = مـن لاذ بكحـيـلان عــده بسنجـــار
عـوق العـديـم الـلي نعـفتـه متيـنـه = يسقيه عقب الزوم كاسات الأمرار
زبن الحصان اللي قـطاتـه سمينــه = وأن صار عند قطيهن تقـل صهـار
أن قـلـت زين زيـن يـا كـثـر زيـنـه = وأقطع من السم الذحاحي وجنـزار
لـو أنـت طيـر لي رقـبـتي رهـيـنـه = متبجح صدري إلى صرت صقـــار
طيـر يشـوق العيـن خبطـت يمينـه = عـفـار مـا بـالـقـاع لحـاق مـا طـار

ــــــــــــــــــــــــــــــ
وهذه القصيده من اجمل قصائد ساكر :

يا الله يا قاضــي غـــرض كـل منيــــوب = عـليـك يـا رب المـــلأ قـضي نـــــوبــــي
يا الـلـه يـا جامــــع بـرد كـل حـالــــوب = تـلـمـنـا يـا الـلـــــي تـلـــم الـذهـــوبـي
كـن الزبـاد بمنحــــر التــــرف مكبـــوب = كـان أبـــتسم عـن ذبــــل تـقــــل روبـي
الــــراس ذيل كـــروش ولا أم عــــرقوب = صفرا نهـار الكـــون فوقــــه نصوبـــــي
عـنــــود يتبـــعهـا من الــريـم جـنـدوب = طــــرادهــا يــــدرق وراهــــا يـحــوبـي
وأن لا يعوها ناحــــرت راس عرقـــــوب = أقـفـت ولـقــــتهـم نشيـــــط الهبـوبــــي
لا باس لو هـو يرهـــــــــم الثـوب للثـوب = لا شـك ما ثوب الغضــــــــــي مثل ثوبي
أدرى وأخاف مدورت كــــل عــــــذروب = المنـتحـيـن الـلي بكــــــــــبـد الجنـوبـي
والله لوني من ورا الشط بالصـــــــــــوب = مـتـولـع فـيـهـم ولــو مـا شقـوبــــــــي

ـــــــــــــــــــــ



الشاعر ساكر الخمشي كان قد جاور الشيخ ضاري بن طواله من شيوخ الأسلم من شمر فترة من الزمن وقد اكرمه غاية الأكرام وفي فترة مجاورته للشيخ ضاري بن طواله , عشق ساكر أحد البنات من نفس الفخذ وكانت ( محيره ) لأبن عمها ،،،، ورفض ولد عمها وقال لا أحد يأخذها غيري ، وقال بعض الابيت ساكر بعد ما رحل عنهم زعلان

يقول : ســــــاكر الخمشي

يامـل قلبـن يلتـوي ليـة الــدوك
بيديـن ظرفـن شاطـرن باشتغالـه
على غزالن صافيـن مابـه شكـوك
عيـوا عليـه الذاهبيـن الطـوالـه
عسى يجيهم من بنى عمهـم صـوك
يومـن بـه المـرور يقطـع بخالـه
جمعن يعزل طلعت الشمس مدلـوك
مدمـي ولاتنفـع عليـه الدخـالـه
والبيض عقب صخيف الوسط عكعوك
كالفـرق بيـن المقتـدي والضلالـة


يقال انها استجيبت بعد ايام قلائل

ـــــــــــ


قصيده غزليه لـ ساكر الخمشي

كريـم يـا بـرق سـرى لـه شعـاعـي = مثل النواضي وسط سوق المدينه
جعلـه على الزرقـا مـدب الـرواعي = يهـدا ويقـدا عـن صفـا راس لينـه
يـا مـل قـلـب تـايـه يــوم أراعــــي = خـلـي نـظـم قـلـبي بسلـك المكـينـه
بعيـون كالساعات خـرس أوساعي = ساعـات سعـاي بالأوصاف عـينـه
جـل الـولـي خـلاق زيـن الطبـاعـي = كـن الفـرنـج بعـكسهـم راسـمـينـه
دمعي درج من موق عيني وضاعي = مثـل الخـرز مـن سبحة قـاطعينـه
دمعي درج من موق عيني بساعي = أهـل دمـع الـعـيـن مـثـل الشـنيـنـه
أنـا بــلاي مـطـنـشـات مـقــاعــــي = أقـعــاي ربـعٍ لـلـنـظـر حـافـظـيـنـه
والـردف شط حـويـّر شـرط راعـي = أمـه جـضـور وبـالهجـل زالهـينـه

ــــــــــــــ

ومن قصائده بالوجد

غـديـت مـثـل الـلي تدالـوه برمـاح = روحـه تـسـل وشـبحهـا يـم أهـلهـا
من موق عينه يدرج الدمع سفـاح = يـبي الـنجـاه وروحـه الـلـه قـتـلهـا
على عشيري يـوم الأضعان تنزاح = فـي ساعـة والبـدو تفـرق احلـلهـا
ــــــــــــــــــــ

ساكر الخمشي له قصة مع ابن غزي حيث مر في منطقة الزلفي فوق ذلوله ومعه بعض جماعته فشاهد ابن غزي يومي بعباته للضيوف قبل ان يسبقه احد الى استضافتهم فقال هذه الابيات:

يااهل الركايب درهموا لابن غزي *** مومي لهشال الخلا في عباته
ياليت عنده مزرعة حب رزي *** حتى برحاهن مايعذب بناته
قرم ليا جوه النشامى يفزي ***ويكثر عليهم نشدته وتهلاته

ــــــــــــــــــــ
من روائعه

غـديـت مثـل الـلي بـدا بالمشاريـف = ضـاعـت ذلـولـه بـالفـلا ما لقاهـا
جـاه الظـلام ولايـعـتـه الـصـواديـف = مـن حـر مابه صاب نفسه غثاهـا
عـلى عـشيـرٍ نـتـّف القـلـب تـنتيـف = تـنـتيـف شقـران الحـرار لعشاهـا
أقـفـا مـع الـلي ينزلـون الأطـاريـف = هـل المهـار الـلي تساعـر احذاهـا
مـنـزالهـم بالخـوف يـم الحجـاريـف = الـلـي يـودون الـعـشـايـر هـواهـا
دار جـفـت سيـد الغـنـاديـر يا سيـف = لـعـلـهـا يـاكـل دبـاهـا حـيـاهــــــا

ـــــــــ

وهذه القصيده الرائعة لـ الشاعر سكر الخمشي رحمه الله

الـلـه مـن قـلـب عـذلـتـه ولا طــاع = مـتـولـع بـالأجـنـبـي مـن هـبـالـــه
الأجنبي يـرث عـلى الكبد الأوجـاع = عـقب العسـل يسقين مـر العـزالـه
المسعد اللي ما هـرج له بالأصباع = والـلي جـرالي بالهوى مـا جـرالـه
ما ذاق وجد فراق زينات الأطبـاع = يـوم الـذرا يطـوي بوسطه حـبـالـه
اغضي عنـه وانا له القلب مـولاع = مـن خـوف لا تدري نـوادي رجالـه
الا وأنـا قـلـبـي رزيـن بـالأوقـــاع = اجـنـب الـمـشـكـل لـدرب الـشكـالـه
اقـفـوا لـبـراق سـرالـه تــلــمـــاع = عـلى مصيـف العـام يوضي خيـالـه

ــــــــــــ
وايضا هذه الرائعه

ياهل الركايب ماذكرتو هواء (ن )لي
........................ الى يذكر ذكرهم بالســــــــــــــعودي
لاوا عشيـــــــري كـل ماقلـــــــت زلي
........................ الى يوطيني مــــراحه قعـــــــــــــودي
اضحك مع المخلوق كوده ايســــــلي
........................ كثر الــــــحكي يفضح ولا مــــنه زودي
اطارد الـــــحذرات في بندق (ن ) لي
........................ ولاني بســـالي عن حـــلي العنـــودي
خله لعله مافعل بي جزا ( ن ) لــــــي
........................ انا الذي بطيت عينـــــــــــي بعــــــودي

ـــــــــــــ
قصيدته بـ طيره

الطير مني ضايع(ن) ياضنيني
يطرد حباري ونتحت بنحـــــداره
علمي بطيري لين حده يميني
وقرب محاري طيرنا في قفــاره
الى بلجنا برقعه قانصينــــــي
قدام مذنب حاجره كالشــــراره
لاشاف جثلات الغلب بالبطيني
مثل العديم الى بعينه نمــــــاره
لجاه عقب الطبطبه والرطينــي
خربوش بذان(ن) خثعبه احمـاره
سوه على الخرب الكبير المتيني
يشبه اقبيسي(ن) ايولع سكاره


ــــــــــــــــ
من روائعه بالوصف

أنـا هـوى بـالـي خـطـات الـسجـلـه = هـذي هـوى بالي وغـايـة مـرادي
حـمـرا ومـذنـب عـينهـا تـقـل قـلـه = كنـه لهيـب النـار عـقـب السـوادي
حـمـرا عـراب الجيـش ما يلحقـلـه = بالوصف تقـل مولفـه لـك أستـادي
ربــداء وشـافـت واحـدٍ قـاعـدلـــه = ودلت تـنـّزح مع قـرى راس وادي
لا جـلـلـوا سـود الـقـرب بـالأجـلـه = والمـاء بعيـد وحـال دونـه حمـادي
رامـوا مـهـامـه سـهـلـة مـا تــدلـه = بـهــا ردي الـخـال مـالــه جـــلادي
مـع جـرهـد الـبـيـداء دروبـه تملـه = تـتــلـي عـقـيـدٍ ضــاري لـلـمعـادي
وأن بركـن عوص النضى بالأضلـه = بـالـقـايـلـه دلا قـريـنـه ايــــــدادي
وأن غـاب عـنهـا كافـره وأسفهلـه = لا تـقـل لــه رب الـمـقـاديـر هـادي
تـشـدى تـهـنـفـل طامح جـاه خـلـه = مـتـعـنـي لــه مــن ديــار ابـعــادي
دلـت تـنقـض مـن فـرحـهـا اقـذلـه = عـقـب المغيـبـة والبطـأ جـاه بـادي
ــــــــــــــــ
من قصائده

الله من عين قزت عن منامه = لاكن صايبها عن النوم ساموح
ياالعين ياعين الخطا والندامه = لوتفتهم ماله من السهر مصلوح
النوم عنها ناير بانهزامه = حطت لها دونه نواطير وشبوح
على الذي لكن ردعه وشامه = خط الحروف وكاتبه من هل اللوح
والعين عين اللي زريقه حمامه = نشدت أنا راعيه قال امس مطروح
حبه صبغ باقصا الحشى تقل شامه = حب الحبيب ولبت الروح بالروح

ـــــــــــ
من قصائده رحمه الله

يــافـاطـري مـدوا هـل الهجن قبل أمـس = الـزاد مـعـهم والأهـالـي بعـيـده
اللـه يـجـيرك يـاذلـولي مـن الـحـمـس = بـعــيده المـرواح وانـتي وحـيده
مـع سـهـلة تـدمـس مـعابـيـنها دمــس = راسـي وراســك والـردي فالحـديـده
وان كان مـاجـيـنا علـى طـلـعت الشـمس = يــافـاطـري عـنا تـزل الـوعـيـده



مــنـقــول

مشكور اخوي على الطرح الرائع بارك الله فيك
لــكـ خــالـــًص الاحــــتــــرامــ و الـــتـــقــديــر
دمـــت بـــوافــــر الـــصـــحــة و الــمــحــبة
ماجد المطرفي

يعطيك العافية ياراعي العليا.

وشكراً لك على ماتنزفه من قلمك ووقتك.



ولك طيب التحية ,



عزام,

قصائد رائعه ...

مشكوووووور والله يعطيك الف عافيه على الطرح الراقي والمميز

وماقصرت ....

صح لسان الشاعر


شكرا على الطرح ياراعي العليا

بارك الله فيك

ابو وتين

مشكوووووور والله يعطيك الف عافيه
وصح لسان الشاعر
وشكر لمن اتحفنا بهذة الروائع
تقبل تحياتي
حربي

أشكرك على موضوعك الرائع

دمت بود