سمعت لي كلمة مدري وش أقصاهـا
حزة بصدري وأنا مانـي بهارجهـا
لو كل كلمـة اليـا جتنـا طردناهـا
بعنا الثمينة بسعـرٍ مايخـا رجهـا
لو مـرت السمـع ماكنـا سمعناهـا
ونقفـل الـراس عنهـا لايبرمجهـا
ومـن يـم هـذا لهـذا مانقلنـاهـا
والناس واجد وتلقى مـن يروجهـا
ومن جابها بين خلـق الله ووداهـا
لوبه مراجل تـرى نفسـه يسمجهـا
ومن عامل الناس في سابق خطاياها
يقعد بـدارٍ خـلا مـا داج دايجهـا
في كنةٍ تشوي الجربـوع رمضاهـا
تابس أغصون الشجر من حر واهجها
والناس بالحق حكم الشيخ ما أرضاها
ما ترضي الناس لو انـك تحججهـا
ويا اللي تبى الطيبة خذها وعطناهـا
وخـل الطريـة طريـة لاتثلجـهـا
وأرسـم لنفسـك حـدود لاتعداهـا
من حط نفسه بدرب الضيق يحرجها
وأن كان نفسك هواها قـام ينحاهـا
حط الأعنة برؤوس الخيل وأسرجهـا
فكـر بمنكافهـا قــدام مغـزاهـا
وأضرب حساباتها وتشوف ناتجهـا