ياضاق صدري رحت يم البعارين

يالله يامعيش الضعوف المساكين
ياكافل(ن) ارزاق شب(ن) وشبيبه
يامعيش اللي يشتغل و المعاقين
والدودمن تحت الصفاء تعتنيبه
يافارج الضيقات ياموفي الدين
يامطلع(ن) شمس الضحى من مغيبه
نعوذ بك من شرانس وشياطين
انت الكريم ودعوتي تستجيبه
تغفر ذنوبي يوم عدل الموازين
مافيه غيرك يالولي نلتجيبه
ياضاق صدري رحت يم البعارين
ونضيع الهوجاس عندالحبيبه
ملحا يساوي بس شوفه ملايين
انلاعب حواره ونشرب حليبه
حبه بقلبي زارع(ن) له بساتين
ولانطيع به من قال لي وشتبيبه
كنه تهرجني هنوف المزايين
تضحك و تكشف لي علوم غريبه
البل. يحبونه رجال شريفين
وتنزل بها الايات صورة عجيبه
واللي مكذبني يسايل هل الدين
الغاشية واياتها تنقريبه
ياما انذبح عنده رجال مسمين
كم فارس(ن) يوم اللقاء ينتخيبه
هنيت من يرقى بها الجال مقفين
ويرد الحريقية ويشرب قليبه
ترتع من الهمل الى اقصى عثامين
مرباعها ها كالفياض العشيبه
من نقرة السلمان الى قور.قدرين
وفياض حلبوصه وغربي شعيبه
مدهال سمحين الوجيه العزيزين
ضياغم(ن) كل القبائل تهيبه
ريف(ن) على الجيران سم المعادين
لياصارت القالات صلبه صليبه
صلوا عدد ما هلت المزن يا حسين
على الرسول الي سكن وسط طيبه

يعطيك العافية ياعاشق الوفاء.


ونعم بشمر الضياغم.

من الشاعر؟

وعندما قريت البيت اللي يقول فيه,,


من نقرة السلمان إلى قور قدرين وفياض حلبوصه وغربي شعيبه,

تذكرت,

قصيدة للشاعر الفارس حريب الدول ( مسواط بقعاء ) أبن سمير شيخ قبيلة ولد علي من عنزة.

وهي عندما طلبت الدولة العثمانية دخيله وأسمه شلاش ورفض أن يسلمه لها,,

وقال هذه القصيدة يطمئن دخيلة .

يا شلاش قلبك لايصيبه وشاويــــش
ـــــــــــــــــــــــــــــــــــــ حنا هل العادات كان ابتلينـــــــــــــا
يا شلاش ما نعطيك حمر الطرابيش
ـــــــــــــــــــــــــــــــــــــ لو جمعوا كل العساكر علينـــــــــــا
وش عذرنا من أم الثنايا المباهيـــش
ـــــــــــــــــــــــــــــــــــــ غروٍ يزين مرود الكحل عينــــــــــا
دونك نسوق المال والخيل والجيـش
ـــــــــــــــــــــــــــــــــــــ وأن لزموا يا شلاش نرهن حدينـــا
إخوان عذرا ما بنا سيس وكديــــش
ـــــــــــــــــــــــــــــــــــــ يرجع معيف وخاسر من يبينــــــــا
حنا الي سرنا بعاد المطاريـــــــــش
ـــــــــــــــــــــــــــــــــــــ حامين من النقره الى حد سينــــــــا
مركاضنا يشبع به نافض الريـــــش
ـــــــــــــــــــــــــــــــــــــ نرهب اعدانا كان صوبه مشينــــــا
وان طار ستر منقضات العكاريـش
ـــــــــــــــــــــــــــــــــــــ عدونا لو كان قاسي يلينــــــــــــــــا
وحنا عذاب اللي يدور التباليــــــش
ـــــــــــــــــــــــــــــــــــــ ياما تسلطنا وياما عفينــــــــــــــــــا



وتقبلوا طيب التحية.




عزام.

صح لسان الشاعر .....

وبيض الله وجهك أخوي حربي والوفاء دربي ... على هالقصيدة الجميلة ...

وعز الله انة صدق ... ف البل عطايا الله ...

وتقبل مروري ...

صح الله لسان قايلها

والله يعطيه العافيه ناقلها

مشكورين اخوي عزام
ابن ضبعان
صقر الراوي
على المرور اسعدني تعليقكم عل الموضوع
لاعدمناكم