واري ما أبكي طيب الذكر واصيح

قصيدة رثاء في العم / خالد سليمان الغراء المطرفي ( رحمه الله )

وراي مابكي طيب الذكر واصيح=أبا الكرم واف الخصال الرحومي

عمي عمدنا بالليال الشلافيح=لاتاهت الأريا قــوي العزومي

ريف الضعيف ومدهل للصحاصيح=ماهي سوالف مرقبين النجومي

ياما جدع جنوب حيل ومفاطيح=ماطالته يمناه راح معدومي

الجود مايطلب على الجود تصريح=بيت الصخا بابه على رجل يومي

انا أشهد انك أبيض الوجه وصريح=وأنا أشهد أنك سالم اللوم دومي

والمرجله ماهي مشالح ومسابيح=ولاهي هروج مصفصفينه رخومي

ناس بشوفتها تشوف التساميح=وناس بشوفتها تضيع السلومي

يارحمو أبوكم يالرجال المشافيح=يأهل الهلل في كل وقت ويومي

دنيا تلاعبنا ملاعب مراجيح=بين الخيال وبين صحوي ونومي

ياما تعللنا ضحوك وتمازيح=وياما بكينا لين بــــل الهدومــي

ومن لامني جعله لفك التماسيح=وإلا يخجه ثومة القلب رومــي

الله يرحمة ويسكنة الجنة أبو سليمان

صح السان الشاعر مطلق الغراء

الله يرحمه ويسكنه فسيح جناته

صح لسانك ياشاعرنا

قصيدة جزلـة وابوسليمان رحمة الله عليه كان طيب وفيه كل الصفات الحميدة


لكن من خلف رجال شروى سليمان واخوانه مامات

ولاهنت على القصيد ياشاعرنا

رحم الله الفقيد و اسكنة فسيح جنانة ..

وصح لسانك اخوي الشاعر مطلق الغراء ..

وبيض الله وجهك على هالقصيدة الرائعة ... وتقبل مروري

رحمه الله وسكنه فسيح جناته= وصح لسانك ياشاعرنا

غفر الله لوالدنا ,,,, وأسكنه فسيح جناته

وتقبل الله دعواتكم ,,,, آمين يارب العالمين

والشكر موصول للأخ / مطلق عيد الغراء ,,, أبو تركي

على هذه القصيدة

صح السانك أبو تركي

أبو سليمان الله يرحمه ويسكنه الجنة