رسم الجفاء
خفي على قلبي تراكي ذبحتيه= خفي عليه اشوي لو بس ساعه
من بين كل الناس قلبي خذيتيه =وأصبح معك يابنت مثل الوداعه
تكفين دامنك خذيتيه ضميه= على الهجر ماعاد فيه استطاعه
وإن كان ماتقوين للضم خليه =خليه للمجهول يبدى ضياعه
هذي ثلاث اسنين والصدر مخليه= وبكفك المنقوش تم انتزاعه
وأصبح محله جرح ماحدٍٍ يداويه =لامرني طيفك يزيد التياعه
كني يتيمٍٍ ما لقى من يراعيه= ضيق به الكون الفسيح اتساعه
لااظلم سواد الليل كثرة بلاويه= زودٍٍ على ظلم القريب القطاعه
رسم الجفاء في الوجه بانت مواريه= وعلى الجفاء ما عاد عندي مناعه
روفي بقلبي دام قلبي خذيتيه= وأصبح معك يا بنت مثل الوداعه
مركب غلانا في رصيفك برسيه= وبكسر مجاديفه وبطوي شراعه
وباجيك كني طفلٍٍ فاتحلك إيديه= خوفه من المجهول زاد ارتياعه
نشمي بن مقعد العتيبي