السلام عليكم ورحمة الله وبركاته
مساؤكم .. صباحكم شعر وجزاله اخواني أعضاء هذا الصرح الشامخ
أتمنى أن ترقى لذائقتكم الشعريه
لقلوبكم الطاهره :
ودي مهو بكيفي أرد الخلايق=واليا عملت الطيب ماهو جماله
الخلق ماتعلم على ويش ضايق=مير العزا لله عزيز الجلاله
ماردني فالطيب مليون عايق=كل مانخاني رجل قلنا سهاله
الراس فالطنخه ترى حيل تايق=ماأقصر عن الواجب على كل حاله
ماعاد بي طاقه ولازلت طايق=لاني ردي علوم وأحمل جهاله
الطيب يبغى له رجل دوم رايق=والطيب يبغى له صبر في مجاله
ماأقول طيب .! مير للطيب شايق=ولاأقول كامل والولي في كماله
أنا رجل فعله مع الناس لايق=من راس قومن كم لهم من دلاله
ويلان من ويلان عند الحقايق=مانلتفت للنقص وأهل الهزاله
ربعي هل العشوا وساع البنايق=وخوالي الفدعان نعم السلاله
لاجيت أفرقها . . فلا من فرايق=رجلن ويفخر بالعمام وخواله
والحمد لله كم بها من وثايق=إعلوم طيب ومرجله مع جزاله
شاعر ولالي فالأمور الدقايق=اللي تحد الرجل صوب الخماله
ودي بفعل الطيب بأية طرايق=حتى ولو قالوا دفع من حلاله
الله يعين ان كان فيها عوايق=الناس ماتعذر ظروف الزماله
قلي شسوي.؟ أصبح انسان بايق.!=هالعلم تكرم . . للوضيع . . الحثاله
منهو يحس بضيقتي فالعلايق=حرام يقنع وش سبب هالرزاله
ليه آتكدر.! والخواطر تضايق=(كل ماآتجمل يجحدون الجماله)
هو الزمن .! ولا .؟ بلاش آتضايق=والطيب مبطي للفتى راس ماله
والله ودي ماأرد الخلايق=مار العزا لله عزيز الجلاله