القائد اللي للوطن ستر وحجاب

القائد اللي للوطن ستر وحجاب

الموت حق ولا عن الموت مجناب =يا ما خذا من طيب مذهب وسيره
يختار ما يحتار فإبعاد واقراب= ويبطش وبطشاته علينا خطيره
من بثت الاخبار بعلوم واسباب= والقلب في جوفه سوات السعيره
لا والله اللي راح فكاك الانشاب= ابو المكارم والفعول السفيره
"نايف" ولي العهد في كل مرقاب= عين الأمن في كل حله وديره
عضيد "عبدالله" كعم كل حراب= والموقف الغصاب فكره يديره
من حنكته يغلب على كل غلاب= مواقفه دايم نجاح وجديره
من الغزوه اللي جات لكويت الاحباب= وإدارة الأزمة بصوره مثيره
للعون لبلادٍ غدت جوع واحزاب= وزلازلٍ تضرب ديارٍ فقيره
للي تسلل من جنوب البلد جاب= شره و "نايف" له سيوفٍ شطيره
قطع وصال الشرذمه والفسد تاب= وهون وقال الله عسى الأمر خيره
خلا الطمع ثم عض في كفه الناب= وأخلا الوطن من قو باسه لغيره
لن الوطن لوجيه الأشرار ما طاب= و "نايف" على الأمن السعودي يديره
القائد اللي للوطن ستر وحجاب =وعنده على الاسلام نخوه وغيره
"نايف" وإلى من قلت "نايف" بمرقاب= يعني كمال الطيب وأعلى مصيره
كفٍ ندي يمتد للعود والشاب =ويضمد جروح الكسير الكثيره
عطاه كنه سلسبيلٍ ومنساب= يسقي عطش من كان "نايف" نصيره
مرحوم يا وجه السعد زاك الانساب= يا ابن المليك الفذ صقر الجزيره
تبكي عليك المملكه حب وتصاب= وتمسي من الفرقا حزين وحسيره
وتبكي عليك العُرب في كل الاقطاب= والمسلمين بكل بقعه وديره
لان الولا لله قطاع الارقاب =ولقيادة الشعب السعودي كبيره
ويا قبر لو انك من الطوب وتراب= كن له إلى طبك مفارش وثيره
ثم عطره بالطيب من طيب ما طاب= وكن له مثل نور الشموع المنيره
الله يجعل قبره رياض وشعاب= ويوسعه ما كثر يبلغ نظيره
ويا قبر وان ضميت من حاز الاعجاب= ارفق عليه وعلمه بالسريره
شعبه وفي وأخوانه الغر لا غاب= يقوم منهم من يكمل مسيره

محمد بن نايف بن بنيان العتيبي

رحم الله الامير نايف


صح لسان الشاعر العتيبي

ومشكور اخوي علىاضافة القصيدة الرائعة

تقبل تحياتي ولك التقدير