دمـــــــار شـــــامل

ماتدري انك تملك الروح وتمون=والقلب يسعد في عذابك ويرتاح
تملك عروش الحب لاتقول وشلون=جالس على عرش المحبه ومرتاح
غلاك ثابت واللي غيرك يدورون=كنك جبال طويق ماعاد تنزاح
دمار شامل عند ساطي ومجنون=تذبح بعينك دون سكين وسلاح
في عينك اليمنى من احكام فرعون= والعين الاخرى ذبحة سيوف وارماح
ياللي كما العناب من بين ليمون=او نبت توت طالع وسط تفاح
وش عاد خليتي من الطعم واللون=اشطر من المصقول بيدين ذباح
سحر الطبيعه خلقة مكون الكون=يشرق بوجه مثل فلقات الاصباح
والله ثم والله مغرم ومفتون=ملكتني في الحب والحب فضاح
بيحت سدي صارو الناس يدرون=أجحد ودمعي فوق الاوجان سفاح
أشغلتني تنشد وانا اقول ماتهون=لاعاد تنشدني ولاعاد تجتاح
لياقلت ما احبك فلا تعقد عيون=مأكد اني يا ادعج العين مزاح
وانا ابا أثبت شي واقع ومضمون =كانك على خبري هواوي ولماح
شايف نجوم الكون يا فتنة الكون=احسب عددها واضرب بكل ماراح
ثم قسم الناتج على واحد يمون=هذا ترا انته يابعد كل الارواح
لاتستمع فاأقوال منهم يعذلون=واسمع مني ناهي العلم ياصاح
مافيه ابد غيرك ولا رايح يكون= خلاص ودع كل الاوهام وارتاح