ديوان الشاعر/ حمدان ربيع المطرفي

ياعميل الخير فالحكمه ... تحَلْ=لايروّح عزمك بليّا سدى
لايغرّك قول عصويد ودحَلْ=والنخل طالته قطرات الندى
مير عندي شور تفتح لك محل=للدعايه مثل من قبلك ... غدى
خابرن منهو يكزّك وارتحل=وطيرك الطاير نشيده ماشدى
ناتج التفكير من فكره ضحَلْ=لو تصيّح ... مالقينا لك صدى
السوالف ماتزيدك يالفحل=وجيشك اللي هاقيَه مايفتدى
مار ارررركد وافهم الطحن وطحَلْ=والهروج اللي تغيّبك بــ ( مدى )

الهاتف الــلــي مــازهــم لــلــتـباشـير=انا بدوري جــيـت أزف الــرســايــل
يامرحبا عــداد الـنـفـل والـنــواويــر=وعداد ماشـدّ الــبــدو مــن رحــايــل
مبروك يانبع الــوفــا والــتـفـاخـيــر=مبروك ياشمر اكــرام الــســبــايــل
مبروك يارجال الوطن والمناعــيـر=اليا ارتكو للحمل شالوالــثــقــايــل
مبروك مزفوفه عــلــى حــلة الطير=ترفع بيارق فالفضــا ثــم تــمــايــل
ياابيات شعري وانظمي هالتصاوير=سيري بي ديار الـكــرم يــم حــايــل
ياشعري اللي لانــطــق شمر ايصير=حتى العقال ودون عــلــم ايـتــمـايـل
ماني بمادح شمر الا بــهــا الــخــيــر=مقدارها أعلى مــن قــصــيـدن وقايل
مرحوم يالوجيه السفــيـره الـنـواديــر=لهم مواقف بالشجــاعــه وصــوايـــل
مشلح شجاع القوم شيخ الــمــغــاويــر=لاثارت اركاب الـعـــدو مــاتــحــايــل
عقيد قوم وسيـفـه أرهــى وهــو غــيــر=سيفه يـمـيــنـه مــالــهــا مــن مــثــايــل
تبسط له اركاب الـمـراجــل طـوابــيــر=حيث انه الطـنـيــه شــديــد الــهــوايــل
أمير قوم وعمر الــطــيــب تــعــمــيــر=مجدن بنـاهالــعــود مــاهـــو بــزايـــل
شملان لاهــبـت ريــاح وأعــاصـــيـــر=مثل الــجــبــل مـاشـفـتـه بـحـال مــايـل
ولا الكرم لامـن لــفــيــتــوا مــسايــيــر=الـشــاهــد الله عــامــرن بــه فــعــايــل
لامــن عــطــى يــعــطــي بـليا مشاوير=مثل الــمـــطــر لاهــلّ خــيــره دلايــل
يفخر به الــخــزيــم وهــو مكسب الغير=والله يـجـمــّل حـالــهــم فــالــجــمــايــل
وان كان غيــره تـفـتـخـر بـالـهـوامـيــر=شملان تفخـربــه جــمــيــع القــبــايــل
شــمّــر ووايــل زودهــا حـرب ومـطير=صيته تعدى نــاطــحــات الــمــخــايــل
واقول مــابــه مــن قصـور الــجـمـاهير=كل قوم فيهــا مــجــدهــا والــعــمــايــل
مرحوم يــامــشــلــح رقـيـت الـمـعـاسير=تبطي تجيبــك نــاقــضــات الــجــدايــل
ماني بــمــادح مـشــلــح الا بــهالــخـير=مقداره أسمى مـن قـــصــيــدن وقــايــل

تعـال إقرا نتاج الشعر ودقق في تـفـاصــيــلــه=ونـا بضبط لك الفنجال من أفكاري مصفّـيــهــا
وهـاك الكيف.! عذرا سم تقهـوى من محاصيله=نتاج الشاعر وشعره عن الــمــنقود مــافــيــهــا
عرفت أضحك من الماضي ونا مغبون في جيله=أســافــر صوب نورن لاح خلال مزون تكسيها
هذاك الفوت لو هو فات علام الصوت باري له=ونا حــاســب حـسـاب أصـوات تفوتني وأخليها
أخاف الصوت يمكن هــو تــظـلـلـنـي هـمـالـيـله=ونا أذكر يوم عانقت المزون ورحت أهــلـّّيــهــا
خفت صوتن ثبت بين المحانـي يـسـبـقــه سيلــه=تحدّر سيله العارم جـبـال طــويــق عــالــيــهــا
وسالت بأثرها الوديان من عـيـونـي تـبـاري لـه=لك الله ليه ؟ وش ذنب الجبال وجرم راعــيــهــا
تجول أشباه من حولي وأحيل الوجد أنا أحيله=بقايا شاعر وقرطاس تبي تنشــد قــوافــيــهــا
جديله لاإلتقى مظلم سواد الــلــيــل مـن لـيـلـه=تدلّى منكبه يبهر عـيـون الــلــي يــرائــيــهــا
ومتنن مستوي فوقه شموخ الأرض حالي له=عليه العين والمفــروش وكحلن بين أرضيها
وسيفه ثــابتن مـابـيـن بـدريـنـه يـسـاوي لــه=يمينه أبـيـض لـيـسـراه وحـدّ السيف مرسيها
وحدره نهرن مصفّى من المعسول جاري له=وخمره وافر وأعذب وأطــهـر إنـّي آجـيـهــا
أنا لو قلت أبوصف له زياده يــاتــهــاويــلــه=ولكن حالت الدنيا ونــا لــلــقــاف أنــاديــهــا
تسوق القاف رجليها على جال وخــلاخــيــله=وخصلة شعر بكتابي ثمان سنين أنــاجــيــهــا
ونا كلي أسى وهموم وحيلن فــاقــد لــحــيــله=أطالع منهو مااطالع ونــا شـامـخ وأعــدّيــهــا
أحاتي غيمتن لفّت بريــقــن مـن مـواصــيـلـه=أحاتي نفس ماتدري عن أحزاني ومآســيــهــا
جمعته ورد وأعطيته من الينبوع صافـي لــه=شعور أصدق من إحساس الكتابه في معانيها
ولكن شاءت أقدار العزيز تـزيـل تــالــي لــه=ونا مؤمن بأن الكون تـحـت تدبير بــاريــهــا
ولاني من لطم خدّه وشــقّ الـجـيـب باكي له=نصيب العبد مقسومه وهذي مانضــاهــيــهـا
وهذا شعري وخطي ورسمي في تفاصيـلــه=وخصلة شعر بكتابي ثمان سنين أناجــيــهـا

جـنـيــت ولاجنيـت إلاّ خـواطـر كــلـّهـا وجْــلـه=مساء النزف في عين الجـروح وعـيـن كـاتـبـهـا
يطيب المـرّ والـعـلـقـم وكـاس أطـعـم وسط حفله=وسط جمـهـور لأحـزانـي وذاك الـهـم طـاربـهـا
عزف ألحان من منظـوم شـاعـر عـاشـهـا مـثـلـه=ونـا فـي ذاك مـقـعـدهـا أحــاول يــوم أقــاربــهـا
مساء الغنج يالتحـنـان قـبـل عـامـيـن وأكـثـر لـه=يمـرّ الـعـام تـلـو الـعـام ونـا غـرقـان أعـاتــبــها
مدامي جاهـل أسـبـاب الـعـتـاب وقـانـعـن قـبـلـه=أنا وش مكسبي لـو عـاد شعـرن ماهـو كـاسـبـها
ونا زيزوم من صلب الرجال وعارفـن بـأصـلـه=عـريـب الـنّـسل من وايل وأفاخر فـي سـحايـبها
تعالي لملـمـي مـاراح ولـمـّي شـمـلـنـا لـشـمـلـه=تعبت اطرد بقايا الأمس وأحدر في مضاربـهـا
ونـا رحّـال فـي دنـيـا غريـبـه وأصبحت غفـلـه=كـذا يعني مصير اللي نسـى أغـلى مـكـاسـبـهـا
أنا وان كنت ماني ذيـب فلانـي راضي بـثـعله=كـذا ولا كـذا الـدنـيــا تسـير بـكـيـف راغـبـهـا
يطـيح اللي يطيح ودون ماتـكسـر بـها رجـلـه=جـبيرة حظـه العـاثـر زمـانـه مـن سـبـايـبــهـا
هـذاك اللي وهب عمره لجل ياصل على سهله=وهـذاك أصبح من المعدوم يغرق في مراكبها
وهـذاك اللي وهب حظه لجل مزيونه وطـفلـه=نست حبه بعـد مـاكـان هـو اغـلى حـبـايـبـهـا
وقف محتـار من سـبـة سـوايـا طفلتن خجـلـه=تناست حبه الطاهـر وطـارت مـع هـبـايـبـهـا
ولاهو راجع اللي فـات مدام الفـوت غـادر له=تلملم شمله الذكرى عـسـاهـا تـعـيـد طـالـبـهـا
ونا وش موقفي ياللي قطعتي الحبل عن حبله=بغيتي مكسب الدنيـا ...!؟ تهنّي في مكاسبها

سلام يامـنبــع ديــار الــسـّلاطــيــن=على الكرم والطيب عذب الســّجـيله
ســلام يــارجــلــن يـفـكّ الــمــزابين=سلام أوفـى مــن ولــي لــخــلــيــلــه
ســلام أحــفى مــن قــدوم الـضّيافين=لاقـــدّم الــواجــب ووفـّى جــزيــلــه
عقب التحيــه وأبـتـدي هــالــعــناوين=وأرتب بـيــوتـي وأوازن ســبــيــلــه
وأصوغ من بحر القصايد مزايــيــن=بحضرة جناب المرجله وأحتفي لــه
أبوي عــبــدالــلــه فــداه الــمــلايـيـن=رمزن على صدري ورمز أنتمي له
ياسيف مسلولن بــوجــه الــمــعــادين=ولاعوّدت فزعه ترى نحـتــمــي لــه
نفداه بأغلى نفوسنا حامــي الـدّيـــــن=ونارد على حياض المنايا قــبــيــلــه
إعيال وايل لازهمـت الــمــلــبّـــيــن=وإبهامك اللي تــرفــعــه نـنـحـنـي له
ياسيدي جيتك على العسر والـلــّيــن=جيتك على بيض النوايا الجـزيــلــه
أبنشدك عن حال رجلن غدى شـيـن=من زود همه مالقى من يــشــيــلــه
عيـّنت منهو لاضحك يبكي الـعـيـن=كنـّه وكـنّ الهم رحم وفــصــيــلــه
الرّكب ولـّى والمســافــه ملايــيــن=يالله سترك والحمول الــثــقــيــلـــه
أحدن هجع مرتاح مايشتكي شــيــن=وأحدن حداه الهم قبل إيــحــدي لــه
وش حيلة اللي حيلته مالهـا إثـنـيــن=إلا جمالـة والــدي فــي جــمــيــلــه
يوم العرب تكنز من أموالها ألـفـيـن=تسعى على جمع الذهب بالشلـيــلــه
وإنت الذي طيبك تعدّى الموازيـــن=ماينعدم بحرك مدامك حــصــيــلــه
فخر الكرم لاشحّ بالفـقـر والــدّيــن=مدّتك بـيـضا يـاكــريــم الــنـّفـيــلــه
هــمـّال مــزنــك لو ظهر فالميادين=غطـّى على كل المزون وهــمــيـله
حكمة رجل يعدل وحنـّا مطيعــيــن=في حكم شرع الله وسنـّة خلــيــلــه
ياسيدي واللي خلق نعمة الــعــيــن=ماقول غير البيت وأختم خــزيــلــه
ياعل عمرك زود عمري مــلايــين=مجدن مشيته سيدي أحـــتــفــى لــه

يامحزمي جارت علـيـنـا الــصـواديــف=من ضيمها غــصّــت حــلـوق الـخـليقه
نــمــشــي ولانــحسب عليها التحاسيف=إلــيـــن مـاتـهـنــا وتــاه بــطـــريـــقــه
تندا يــديــنــا مــاحــســبـنـا المصاريف=واليوم كـلن مــاعــرف مــن رفــيــقــه
ماحاشنا المنقود مــاهــي تــخــاريـــف=والرجل فينا ما اخبــر مــن يــعــيــقــه
أحرار من نــســل الــكــرام الـكـواتيف=والرجل فينا مــايــخــون بــصــديــقــه
إعيال وايل ساسنا مــكــرم الــضــيــف=رصيدنا بالــطــيــب مــالــه ســبــيــقـه
قم يانديمي وإعـلـمــه دون تــحــريــف=رسايل الــشــاعــر وهــاك الــوثــيــقه
ونا بجهّز هــالــقلــم والــمــظــاريــف=بنقش لـــه الــقــيــفــان وأبدي الحقيقه
بلّغ سلامــي فــالــبــدايــه بــلا زيــف=الشوق فــيــنــي يـلـتـهـب مــع حريقه
قلّه تراني حــزتــهــا بالــمــواقــيــف=شاعر وشعري ســاطــعـن في بريقه
أغوص في بحر المعاني على الكيف=ولاني من اللي شعرهم مــايـلــيــقــه
أي بالله شاعر وأعـتـلـي شامخ النّيف=إي بالله شاعر والبحر مــن عـمـيـقـه
ربعي هل العشوا بــلــيــّا تــعـاريـف=جحافل جيوش الــمــنــايــا تــريــقــه
يامحزمي ماعــاد فـيـهـا تـصـاريــف=الشوق طاغي والـلـيـالــي تــعــيــقــه
صيفن يعدّي ومـقـبـلـن بـعدها صيف=ونا أتحرّى والـصـبـر مــلّ ضــيــقـه
ياهاجس الذكرى إلى أقـبـل الـصـيـف=قلّي متى الــدنـيـا تــلــمّ الــخــلــيــقــه
عزاي لـلـي صـرّف الــكـون تصريف=وهذا إنت تعرف لاقريــت الــوثـيـقـه

حي من صان العهد=شاعرن لامــن وعد
وافين حــرّ وســنــد=يركي حمول الجبال
كافي اللي فـــاتــنــي=ضاع عمري وقادني
للمصايب ســاقــنـــي=ماحشم سَلْم الــرجــال
عشرة الماضــي نسى=يوم غادر وإنــتــســـى
ماهو طبعـــه لاقــســى=قاطعن حبــل الــوصال
ذاك ماحــصــل وكــان=والرجــل يظهر يــبــان
لاذخـــرتــه لــلــزمــان=محــزمــن فـي كل حال
مار وش حـــصل وجاه=يــوم طوّل فــي جــفــاه
مــاعــرف قـدره وسماه=وش حصل يابن الحلال
أذكر إنك لاســهــيــت=للمراجل مانــســـيــت
والصداقه مــاقــســيت=كنت لي بــدر وهــلال
أذكر إنـّك يـالـصــديق=ساطعن مثل الـبــريـق
يوم لدروبــي رفــيــق=ماتــزحـزحـك الـثـقال
العتب وأصـبـح كـبـيـر=في خِضامـن مـع هجير
وإختلط بـعـض الـكـثـير=لكن إسـمـعـنــي تــعــال
لو تــلــفّ الــمــمــلــكـه=مـــــاتــحــاول تــدركــه
مــيــر قــلــهــا فــرنــكه=والشعر مـعــنــى يــقــال
جبت لـلـمــعـنـي قـصـيــد=ناوي أكـتـب مــن جــديــد
وأرجــع أذكــر ثـم أعــيـد=الـــصـــداقـــه راس مــال

العلم ياقوم الردى و البخاشيش=من واقع الذمه ترى ماغدينا
لاصارت الذمه بسربة خفافيش=مرفوع عنا اللوم يوم ابتدينا
الشخبطه واللخبطه هي خرابيش..؟=ولا حساب ومسأله مااتعنينا
الدلو يابيري ونا فاهم الطيش=مايمنع الشاعر مدامه ذهينا
مايمنع إن الكدش تجمع كداديش=دام إنها بصيغة جماعه تجينا
ولايزعل الدرويش خولة دراويش=ولايربح الليله وبارح قضينا
إن كانت الدعوى بليا تشاويش=ياهملالي كسبها محترينا
ولو شاشت الدعوى نزيده وشاويش=تنعاج الأرقاب الرهيفه بيدينا
اللي نبت ريشه ترى ننزع الريش=وكم ليلتن ظلما عليها سرينا
المال ماورث سلاله على العيش=ولايرجع الميت مدامه دفينا
ونطح الجبل ماهو مثل نطحة كديش=شف العرب حولك وهم عارفينا
ودخيلنا دونه سيوفن معاطيش=نذود عنه فزعته لاانتخينا
يوم إنها مرسال جونا مطاريش=وشلاش لامنه دخل من يجينا
السيف يحكم ياكثير الطواريش=والشيخ أبو راجح نذرها يمينا
ياشلاش مانعطيك حمر الطرابيش=لو جمعوا كل العساكر علينا
دونك نسوق المال والخيل والجيش=وإن لزموا ياشلاش نرهن حدينا
مار إنتبه ياهيه خطك تفاتيش=والسوق لاتدخل ترانا شرينا
والشخبطه واللخبطه مو خرابيش=وحسابها بالسيف ياجاهلينا
ملبسك ياجاهل قديم الدشاديش=والعلم واصل من لبيب وفطينا
واللي نبت ريشه ترى ننتف الريش=حنا بني وايل فعلنا وخذينا

عليك باللي خوته ترفع الراس=قرم ونزيهن مايدور الهزيله
ماهو بمثل اللي فعل فعل جساس=يومن غدر بكليب زوج الجليله
هذا الزمن يجمع طهارات وأنجاس=وكلن على فعله يحصل حصيله
والمرجله حسبه ومعيار وقياس=والطيب بحرن والمعادن قليله
وكلن يقيس الفعل مع باقي الناس=وألزم على الرجال نيل الطويله
رجلن تشوفه فالمواقيف نبراس=ورجلن تشوف بخوته ألف ميله
ورجلن يفز بشوفتك مثل قرناس=ورجلن ليا شفته تدسدس بشيله
ورجلن تشوف بمجلسه كل نوماس=ورجلن يسب بمجلسه فالقبيله
ورجلن تشوفه بين دله ومحماس=ورجلن تشوف القوم ماتنعني له
ورجلن يثمن هرجته بين الأجناس=ورجلن خمال الهرج يسلك سبيله
ورجلن يشوفه شايبه معدن ألماس=ورجلن مع الشايب يجيب الفشيله
ورجلن مع الشيبان ماجاب الأدناس=ورجلن مع الشيبان فرقى مثيله
ورجلن لقى ثوبه ذرى ستر والباس=ورجلن لقى الموضات ستره بجيله
ورجلن كريمن مالقى المال مقياس=ورجلن يدور المال نفسه بخيله
هذاك والله خوته ترفع الراس=رجلن ويسوى في عيوني قبيله
وهذاك لابالله للطيب نكاس=فرقاه عيد وخوته مستحيله

سلامي يااهل الطيب وأهل الرجاحه=من منطلق شاعر وعنده قريحه
البحر حجمه مالقى له مساحه=والجو صافي والمساحه فسيحه
أما بعد والحبر ينزف جراحه=نقطه ليا آخر نقطها جريحه
قل فوضويه وإعتبرها مباحه=أو فلسفة شاعر عسى الله يبيحه
قيل البلاغه من علوم الفصاحه=في مبدأ العالم تسمى فصيحه
وإختلفت الآراء دون الصراحه=والقمع واضح في خفايا صريحه
وشلون ترجي طير كسر جناحه=مدفون في عامه وحاله كسيحه
الغطرسه والهيمنه والصياحه=متقاربه بالوزن وأكبر فضيحه
واللي يوردني لأمور البجاحه=ساويته بماطا القدم والنطيحه
الشعر ذو حدين كانه سلاحه=وأسمى فنون الشعر شعر النصيحه
ومعارك الشعار في كل باحه=ماهو طموحي كان هذي صحيحه
أنا خذيت المجد قبل إجتياحه=ويلان قومي كم سنامن تزيحه
وإن عودت طيب العرب والسماحه=قومي على مركا العرب مستريحه
لو كنت في بحري أجيد السباحه=فاعلم بأن البحر مثل القريحه
والصدر لاضاقت يبان إنشراحه=يوم النفوس الضيقه مستشيحه
ماراودت نفسي أمور القباحه=على الذي زاور أمورن قبيحه
جهاد نفسي بالصبر مع كفاحه=وأخذ العبر ممن سبق في ضريحه
حكمة زمان الطيب ضد الإزاحه=إما يزيحك عفنها أو تزيحه
الله يجنبني أمور الوقاحه=الناس ماترحم ونفسي جريحه
حتى المسا ماعاد يفرق صباحه=وش باقي نعرف عينات وشريحه