قصيدة للشاعر / مطلق بن عيد الغراء
في رثاء أخيه / خالد بن عيد الغراء
رحمه الله وأسكنه فسيح جناته
واقلبي أللي لفه الحزن لفا == لف الظلام بليل والجو غايم
دنيا تلاقينا ودنيا تقفا = = ولاحيْ فينا بالسلامات دايم
ياما عطتنا من حلاها المصفى = وياما عطتنا من شطنها العظايم
ياما شربنا كيف صيني يشفا = = وياما علينا يجدعون العمايم
وياما جلسنا في شتانا نتدفا = = وياما هجرنا بيوتنا للنسايم
وياما مشينا بنايفات المهفا = = وياما مع القيعان طق اللثايم
ياقلب اثبت لا تخاف وتخفا = = الموت لا تنشد عن الموت حايم
أمسً عضيدي بالسلام يتحفا = = واليوم عانه بالكفن والحزايم
أبكي عضيدِ في شبابه توفا = = فجيعة خلت قوايا حطايم
وهلت دموع العين والريق جفا = = وضاقت عليّ فجوجها والخرايم
ليته بنذل مايقدَّر ويرفا = = عفن الرجال بالعفانه متلايم
ليته بخِمع بالهروج يتشفا = = ولد العجوز وساعين بالنمايم
يالله ونرفع في دعنا الأكفا = = يالله يا محي العظام الرمايم
يالله بالجنة مقره وملفى = = البار بالوالد مصلي وصايم
لجنة الفردوس وحور تزفا = = الله كريم ورحمته له علايم
نار بصدري حرها مايطفا = = حتى توزع بالتساوي القسايم
إلياء فهمني فاهم قلت كفا = = ولا هوب لازم يفهمون الطغايم