البارحة ليلي هواجيس وأفكار= ماشفت مثله ليل فالعمر مره
أفكار لو توزن تجي فوق قنطار= مره يروح الفكر ويعود مره
لديت يم القلب وانشده وش صار= وكيف الحياة الحلوة تصير مره
قال ابتعد وأنسى ترى البحر غدار= وان كان مامرك قدرك أنت مره
قلت أنت ياذا القلب بالحيل مكار= هات الخبر راضين جمره وتمره
قال الصحيح انك تعجل فالأقدار= أركد ترى منته من عيال مره
قلت الشطارة رمز لرجال شطار= ناس (ن) تعّرف الوقت برده وحرة
قال استمع مني نصيحة بمعيار= ما كل من طارت من صقور حرة
قلت الحقيقة مانبي رموز وأسرار= علم (ن) وقع وشلون عني تسره
قال أنت ماتسمع لنصحي والاشوار= واللي سواتك عجل مافيه سره
قلت أنت تعزف لي على عود وأوتار= والعلم واضح مير ياقو شره
قال الحقيقة بينه وأنت نكار =والقلب مايمشي على غير جره
فكرك سرى ليله من عيون غدار= لخبط كيان الفكر والقلب جره
تله وتل صويحبه تل جبار= وقفى وخلى فالحشا منه جمره
لأعاد ترسل له مراسيل ذمار= ما كل من غاص البحر جاب دره