هاض الضمير وهاجس الغبن يجتال = في داخلي والقلب باح بكنينه
وكن الفضى عني مقفل بالأقفال = أبي السكينه مالقيت السكينه
من جال جابتني ودتنــي لجــال = وش فاد لو قلت الليالي لعينه
ومشيت مدري ضايق الصدر والبال = وعفت المدينه وحتفال المدينه
والفين كيلو وأنت مفتاح الأمال = ومثلي تبين كل عازه بعينه
أحيان بالانسان الاحلام تقتال = وشرواك بعد الله يقوم ويعينه
فرحان يالصنديد ياذرب الافعال = ياللي شماله ماتخالف يمينه
تحيه تعداد ماهل همال = واعداد ما بالبحر تبحر سفينه
قدمتها يالمطرفي لك بالامثال = هديه من قلب مابه ضغينه
مواقفك تشهد وتشهد لك ارجال = كم واحد مديون خلصت دينه
ولاني طالب غير موقفك بالحال = واللي يعين الناس ربي يعينه
بعض البشر لاجيت تنخاه رجال = لو كان مافي عرف بينك وبينه
يمشي على مطلبك ويسمح البال = يقضي لزومك عند وقته وحينه
وبعض البشر ماله على الطيب محوال = ماينفعك لو العلاقه متينه
عن حاجتك فيه التزامات واشغال = عنده ولايدري عن الطيب وينه
من جاه ماكن انتخابه ولاقال = والله غبينه يالسنافي غبينه
ويارب كل اللي عليه الدهر مال = شرواك يرميه السعد في يدينه
يافزعه اللي من الشقى حالته حال = ويافزعت اللي لوعنه سنينه
فال السعد لك فال ياطيب الفال = يوم البشر تعرف بزينه وشينه
وياسيدي والعمر يفنى ولو طال = وتبقى العلوم اهزال والا سمينه