لو تغليت لك حب بقلبي يزيد = ولك مكان تمركز فيه وسط الفؤاد
والله انك حبيبي لو يطول المديد = ولو يطول الزمان وخذ كلام وكاد
دام ينبض بوسط الجسم دم الوريد = ما نسيتك ولا غيرك لقلبي مراد
خذ تعهد بهذا يا عيون الفريد = ما لقلبي على فرقاك صبر وجلاد
تكره الهون نفسي وأنت راسك عنيد = لا تحب المهونة لي يشكل العناد
ارهن النفس للي بك غرامه شديد = داعبه بالحنان وتملكه بالوداد
وانعشه في مضاليل سهمهن يصيد = نظرة الود من عين زهاها السواد
يا عيون اشقر للصيد طلعه بعيد = كاشفين قنوصه برقعه للهداد
الله اللي عطاك الزين شيء أكيد = خالقك صورك في حسن خلق العباد