البـارحة مـانمـتُ وأنـوح نـوْحـي = كنّي كسير الساق والقلب مطعون
همٍ سـكن بالقـلب عيـّا يـروحـي = عـانيت منه وكـثرالناس يـدرون
من الزمـان اللي علـيه شحـوحـي = من شـافني قـلي سـفيهٍ ومجنـون
مـا يـدري إنـه دايمـاتٍ جروحـي = نــاس تصــفق والـــبقيه يغنـون
والهم في قـلبي يحـطم طموحـي = غديت كنّي داخل السجن مسجـون
وقمتُ أجر الصوت والناس توحـي = قالوا عـلامك قلتُ يالربع مغبـون
وا قلبي ياللي من خفوقه يفوحـي = فـوح الدلال اللي على النار يغلـون
واللي بقلبي مـا يبي له وضوحـي = وضحتُ ومابي ياهل العرف تكفـون
أبغى النصيحة يالصدوق النصوحي = علمني ويش الحل يالقرم وش لون
عـلمٍ وكـاد ولا يبي له مزوحـي = غديتُ كنّي بين طـاعن ومطعـون
فرحان أبوسلطان عالي الصروحـي = ياما على بيتـه من النـاس يلفـون
مـا ظنتي غيره يـداوي جروحـي = اللي على جـاره وكـيلٍ ومـأمـون
يا للي على نيل المكارم طموحـي = ومن الخطأ يامعرب الجـد مصيـون
راعي الكرم ماهو بخيلٍ شحوحـي = يمنـاه تنـدى مثل غيـمٍ به مـزون