راكب الــي ناجبينه للابعــــــاد = يقطع مسافات السفر سبرماني
شد الوكاله ضامنينه على مـراد = يفوق بالجوده وهو بهبهانــــي
من منطقتنا الصبح يمشي وينقاد = يلوق للشاعر وطق الغوانــــي
يلفي على فرحان زيزوم الأمجاد = ساس الرجال مكملين المعانـي
بقـدومكـم ياجيــت دلـه وبـــراد = وحيـل تلقــط للنشامـا سمانـــي
مع موقـد الفنجال للجــود معتــاد = فنجال هيـل مزود زعفرانــــي
مذكور أبو سلطـان للحيل جــلاد = يكرم اليا شح البخيل الهدانـــي
المطرفـي فرحـان ياجيت نشـاد = فرحتك اليا حدك ظروف الزماني
تجيه دقلات الجماعـه والافــراد = وعلمه يشد الراس للناس باني
وان صاربالموقف صعوبات وعناد = انصه ترى الطيب حلي العصاني
باليت ابن فهران عندي بالاوجـاد = يوم أن موترنا اخذوه الزباني
افعول ابو سلطــان قدام الأشهــاد = معروف بالنخوه لكل العواني
عقب السحالي به تواريخ الأجداد = فرحان له بالعرف قدر ومكاني
يالنادر الضرغـام ياعــز وسنــاد = اقولها واعلنت فيها اعلانــي
وصلاه ربـي عـد هتــاف رعــاد = وعداد من صلى وصام رمضاني