من يلتفت للناس ....( شاف العجايب )=حتى ولـو صـدره بصـدر الشمالـي
أحدن على نفسـه ييجيـب المعايـب=وأحدن علـى نفسـه يضـدّ الليالـي
ياهـي غريبـه مـن كبـار الغرايـب=(خالي ربع صارت بعـد ربـع خالـي)
من يعرف المعنى ...؟ وعنده طلايـب=أحسـن يوفّـر هرجتـه دام غـالـي
لكن عنـدي (لغـز) لاهـل النشايـب=أبسـرد القصـه وأخـايـل خيـالـي
كانوا هناك اثنين ( صايـب وجايـب)=كل (ن) بنى حلمـه بـروس العلالـي
جايـب يفكّـر يشتـري لـه حرايـب=وسياستـه عميـاء ولاهـو مبـالـي
يبـي يشـنّ الحـرب ضـدّ القرايـب=حتّـى يقولـون العـرب (همّـلالـي)
لكنّ صايب عكسه ( بـراس صايـب)=الله عطـاه العقـل ولسـان حـالـي
سبحان ربّي وش خـذى كـل شايـب=طريـح بفراشـه ويـاوجـد حـالـي
جايب : يبه بتموت والـورث سايـب=عطني صكوك ابيوتنـا ( ذا حلالـي )
أبوه:واخوانـك ..؟ عسـاك الهبايـب=اللـي تدكـك قبـل تجحـد عيـالـي
عـز الله انـك مـن نوايـاك خايـب=مـن يومـك صغيّـر عطيتـك دلالـي
من بدّ خيّينك .....على الفعـل عايـب=واليـوم تبغـى موتتـي مـع زوالـي
فجأه دخل صايب .... لقى الوضع رايب=يبه عـلام الدمـع ..؟ يـاراس مالـي
أبـوه: كنـت أذكـر رحيـل الحبايـب=أمـك وجـدّك وأربعـه مـن خوالـي
بأسبـاب ياوليـدي تجـرّ السبـايـب=فطنت علي السالفه وش جرا لـي ...!
واليـوم قبـري دون فعلـي وجايـب=ردّ الفعل من عقـب ماهـو طـرا لـي
ولا انت ياصايـب تركـت المصايـب=شفت الجفـا منـي وياضيـق بالـي
ياما علـى شانـي فعلـت الصعايـب=ويامافعلت اللـي عنـى ماعنـى لـي
أبوه مـات بتوبتـه ( مـات تايـب )=سبحـان ربـي دبرتـه فـوق عالـي
نفس السواة اليـوم يااهـل النجايـب=(وأدري جوابي واضحن فـي سؤالـي)
مافيـه عـلـة مـاوراهـا طبـايـب=لو كنـت فـي فهـم القضيـه تبالـي
صايب وجايب مدري جايـب وصايـب=فرق السما للقاع وافهـم مثالـي....!