بالله قلي والصدر غارق اهموم=والعمر مايحسب مسافات وأميال
عمرك وهو عمرك إذا فاتك بيوم=بآخر مطافك ميت بكل الأحوال
بتقول عايش وإنت ضايق ومهموم=والحال كل الحال زايل ومنحال
دنياك هذي لاتغرك على الدوم=محدن ترى خالد وباقي على حال
لو كنت شيخ وتنحسب بأكبر القوم=وتملك من الدنيا رصيدن من المال
ماإنته بضامن عمرك بحزة النوم=حتى ولو تدفع ملايين الأموال
للموت سكره وآخر الموت معلوم=ويالله ثبت موقفي عند الأهوال
لابد يوم وتنذكر فيه مرحوم=وتودع الدنيا ولو فعلك اجبال
كل حاجه تبدا تنتهي وإنت ملزوم=تسأل عن اللي وش عملته من أعمال
لاوالله الضيقه صلاتك مع الصوم=ضيعتها جاهل على غير منوال