زخرف
من غير ربك يفرج الهمّ والضيـق
العبد مالـه غيـر مـولاه قـوّه
لاضاق صدره واشتكته المعاليـق
ونادى بصوتـه للوفـا والاخـوّه
وليا خذلوه اهل الوجيـه المدانيـق
يرفـع يديـه وللكريـم يتـفـوّه
يدعيه في حسن العمل والتوافيـق
ويكفيه من شـر الزمـان ودنـوّه
ويذهب حزن نفسه وضيق المغاليق
ويبسط له برزقـه ويرفـع سمـوّه
ويصدق مع الله قبل ماينشف الريق
وقبل صديقـه مايعاتـب عـدوّه
ويلقى الاجابه قبل ماطرفـه يفيـق
من غمضته ويـرد يبغـى علـوّه
من واحدٍ بأمـره جميـع المخاليـق
كانـت وتفنـى والحيـاه اتمـوّه
وهذي هي الدنيا وصالٍ وتفريـق
كلٍ تبـي تعطيـه خيـره وسـوّه
محدٍ سلم منهـا وذبّ الشواهيـق
الحاضره واللي مـع أبلـه يـدوّه
كل البشر تطرد وراها عشاشيـق
حتى كبير العمـر لاهـي وتـوّه
تغري قليـل المعرفـه بالمساحيـق
وهي زخرفٍ فاني و وجهٍ مشـوّه
والادمي ماصار له مـن لواحيـق
كلـه مقـدّر مـن بدايـة نمـوّه
عمره هدف واقدار وقته تفافيـق
والوقـت ماخلّـد منـار النبـوّه
حاول تضع لإحساس قلبك مسابيق
ورشاك عن بيـر الملـذات طـوّه
مادام في قلبك غصـون ٍ مواريـق
عرقه مـن الايمـان غـذّه وروّه
قدام تلعب به هبـوب الصعافيـق
وماينفـع الندمـان ليتـه ولـوّه
والموت لابده على ابن ادم مويـق
يهـدم ملذاتـه ويعصـف بجـوّه
حق ٍكُتب على النفـوس بمواثيـق
ولا جـاء يتـمّ مهمّتـه ماينـوّه
اعمل مادام سنين عمـرك زماليـق
الوقت ماتظمـن هنـاه وهـدوّه
يمضي وحنـا غافليـن ومشافيـق
وياقلّ مايصدق مع النـاس نـوّه
وقتٍ يذل اهل الوجيـه المطاليـق
ويعزّ فـي شرعـه قليـل المـروّه
فيه الصقر يضرب حساب الغرانيق
ويُحقربه النـادر ويقنـص بـوّه
من بعد ماهو معتلي قمـة طويـق
حطّت به الايام فـي كـل هـوّه
الشاعر : نهار بن ممدوح
