ما يخلف الهقوه اطوال الاشانيب = وانا هقيت بصاحبي من فترات
ادري على جروح قلبك معاطيب = ومقدر الموقف من دون الابيات
محدن على الدنيا موثب تواثيب = كلن على دربه يمضيه بسكات
هذي دروب الكل مابه تعاريب ! = كلن فقد مضنون عينه بنزعات
هذي امور الله مابه مطاليب = كلن على يومه بيذوق سكرات
مرحوم ياللي ماذكرله تعاتيب = ولا اذكر انه بالخطا فيه فزات
ماني بغيبي ولا عالم الغيب = مير الرجال تبين وقت المهمات
مافيه ضيفه كل ابونا معازيب = في خوته في غيبته بكل مافات
في رفقته جبت عدة مكاسيب = وفي روحته من لوعتي جت حزات
حتى العقل من روحته جاه تكذيب = سج العقل من روحته سج سجات
ناسي بأن العيد مابه اصاحيب = ومرسل رسالة تهنئة له بالذات
وامحدده بالقائمه دون ترتيب = وادري الرسالة معلقه به ولا جات
بس الاولوية قبل كل الاجانيب = هذا القريب بقربته له معزات
اذكر اموره مابها الشك والريب = افعالنا تذكر لو ان الجسد مات
مرحوم يابن عواد مرحوم يالذيب = ومرحوم ياللي بالقبر ضم ضمات
يالله يامعبود ياجزل التواهيب = تنزل على قبر المحبين سكنات